Feschd Feschde feira isch mer faschd z’viel
Der Tandler steckt im Freizeit-Stress
Also, letschda Samstag hab i an am knappa Vormittag dia denkbar gröaschda Kontraschde in Nearle erlebt: Zearschd war i auf dr Kaiserwies am Flohmarkt, wo ma für a paar Euro auftragne Hemda, vergilbte Büacher, altes, verranztes Gschirr und soweiter kriagt hot. A paar Meter weiter war des Gschirr sauberer, do hab i mi zu am Kruag Radler und a paar Wieschdla am Schpidalhoffeschd bei zünftiger Volksfeschd-Schdimmung nieder glossa.
Wie i dann zum Marktplatz weiter ganga bin, sieg i mitta im Volk a paar todschicke Ladies mit groaße Hüat und Gentlemen mit very britische Cutaways in a Kolonne von Limousina eischdeiga – Gäschde von dr Öadinger Fürschdhoachzeit, dia wohl in Nearle zu schpeisen beliebten. Des war koi Zufall, dass i alle paar Schritt auf a anders Ereignis gschdoaßa bin, weil an deam Dag war immer und überall was los: am Nomittag no dr Nearlinger Schdadtlauf, dann glei alle zwoi Freilichtbühna-Schdück hinteranander in dr Alta Baschdei, in Marktoffing war Bezirksmusikfeschd, in Hohaalti des 1100-Johr-Feschd, in Wassertrüdi des Afrika-Karibik-Feschd und dia allermoischde Feschdla hab i wohl gar net mitkriagt. Und des war, so außergewöhnlich dia oinzelne Veraschdaldunga o warad, a ganz normals Sommer-Wochaend, dia Wochaend vorher und drnoch isch genauso viel los. I hab gar net gwusst, wo i na soll und hab doch des Gfühl ghabt, dass i’s moischde versäum.
Und wissad dr was? I gloob, des isch genau des Lebensgfühl in oosrer Überfluss-Gesellschaft – jeder rennt dauernd allem noch, von Unterhaltungs-Events über Karriere-Chanca, Gschäftstermine, E-Mails und Poschds bis zu di nuieschde Partnervermittlungs-Agebote im Internet; am Schluss brechads zamm, keuchad „Burnout!“und checkad aufm weg ins Krankahaus no ihre 213 tägliche Mails. Es isch wia mim Haas und ‘m Igel – ma ka renna, so viel ma will, ma kommt doch nia ans Ziel – mei ganzer Samschdag war ausgfüllt, und doch hab i des Gfühl ghabt, i hab’s moischde verseimt. Ui wissad ja, wia des isch: Dia Kirscha, wo ma net nakommt, sind beschdimmt no viel besser wia dia, wo zuhauf im oigna Garta wachsa und über dia Veraschdaldung, wo man et nakomma isch, ärgert ma si länger, als ma si über des freit, was ma mitgmacht hot. Obends hab i dann des oizig Richtige gmacht: Wia i mir dia Hoor grauft hab, auf welche von deane drei Top-Acts i jetzt no naganga soll, hab i mein Veraschdaldungs-Kalender packt, ins Eck gschmissa, mi auf mei Terrass ghockt und in aller Ruah a Bierle drunka – so wia frieher o. Und wia frieher o war’s grad schee und entschpannend und i hab überhaupt nix von dera Hektik do daußa versäumt. Sollad si doch andere derrenna und in der nuia Wuch glei weitermacha mit der Jagd noch Sonderangebote und die nuieschde technische Attraktiona. A propos: Des Smartphone-gschduierte Hightec-Zahbieschdle gibt’s ab Meede o bei mir im Gschäft miz zeah Prozent Rabatt. Aber nur am Meede, also Beeilung!