Dreimol übertüncha riacht noch Verzweiflung
Der Tandler wundert sich über Oettingens Dauerversuche, sich einen neuen Anstrich zu geben
Di Hainsfarther hom da Necknama „Hommelwäscher“. Weil, wia amole dr alte Dorfschdier ootauglich wora isch, hod dr Legende noch dr Gemeindediener in dr Schdadt zwar an Prachtkerl als Ersatz kofft, der hot aber dia falscha Farb ghabt: alle Küah im Dorf warad braun-weiß gfleckt, aber dr nuie Hommel war schwarz. Drmit er widder passt, sind’s em mit Bürschda zu Loib gruckt und hom probiert, dia unpassenda Farb azumschrubba.
So, und irgendwia sitzt der Goischd von di Hommelwäscher abbl no in dr unmittelbara Umgebung feschd, nämlich im benochbarta Öadi, do wo der Hommel seinerzeit vermutlich a herkomma isch. Dia Öadinger versuachad seit a paar Johr, ihrar Schdadt oo laufend an nuia Aschdrich zum geba, drmit’s meahner her macht und vor allem meahner eibringt.
Zerschd wolltads dia ganza Schdadt zuarer GmbH macha, um Schdeierschlupflöcher zum finda. Do hom di Behörda dann schnell an Riegel vorgschoba, so dass si des nimme glohnt hot.
Nocht hom’s vrsuacht, a OutletCenter zum wera. Des hot net funktioniert, weil so a Center normalerweis anrer Autobahn liaga muaß und zum Eizugsgebiet zwoi Buchschtaba gfehlt hom: Rias hot net glangt, riasig hätt’s sei müaßa.
So, und jetzt dädad’s gera „Fairtrade-Town“wera wolla. I will ja gar net saga, dass des net got odder nix bringt, eher im Gegadoil: I moin, bis des Zertifikat kommt und greift, isch’s eigentlich nix bsonders mehr, weil des dann ja eigentlich für jeda Kommune a Schdück weit selbschdverschdändlich sei wird, dass in etliche Gschäfter mindeschdens zwoi Artikel aus fairem Handel schdammad und dass di Kommune ihre Gäschd und Mitarbeiter koin Sklava-Kaffee vorsetzt.
Des wird alles von alloi komma, als oine von di guate Seita von dr Globalisierung. Wann i aber scho widder lies, dass des Ganze amtlich durchorganisiert wera soll und a „Schteuerungsgruppe“für a Umdenka im Konsumverhalta sorga soll, a paar Sätz weiter aber scho widder dia Brems neig’haut und gsagt wird, dass es bei Sitzunga nur no Wasser gibt, weil ma si den Fairtrade non et amole do leischda ka, dann här i scho widder da Papier-Tiger (aus artgerechter Haltung) rumschleicha, der wo des ganze auffrisst.
Noi, Leit, des Fairtrade-Bewusstsein kommt flächendeckend, do brauch i mir als oinzelna Schdadt koin schwarz-blau-grüana Orda ans Revers hefta. Des klingt noch die Fehlversuche wia GmbH-Stadt odder Outlet-Center eher wia a verzweifelter Versuach, si irgendwia an nuia Aschdrich zum gäba.
Do fallt mir ei – i hab no an Satz Toaschder, Mixer und Kaffeemaschina in ganz greißliche Farba in meim Lager rumschdanda. Wann i dia in grelle Paschdell-Töne umlackier, dia wo grad Mode bei Küchageräte sind, kennt ja vielleicht no a weng was ganga. Zur Kaffeemaschin gibt’s dann o a Päckle Fairtrade-kaffee drzua.
Der Tandler