Fitzelkram schtatt Maschterplan
Dem Tandler gehen ein paar Visionen ab
Neilich, wia i im hintra Lager widder amole ganz verzweifelt noch a paar Rasierapparat gsuacht hab, isch mei oina Verkeiferin drzua komma und hot frech g’sagt: „Do kennas noch der Corporate identity und’m Gschäftskonzept für oosra Kruschdlada oo glei suacha.“Quasi reflexartig hab i g’antwortet: „Mir sin in Nearle, do brauch mer koi Konzept.“
In di letzschte Tag und Wucha isch mer nämlich aufgfalla, dass dia ganze Zukunftsvisiona von nuie futuristische Schdadtviertel grad genauso zerret werad und zerbröasla wia dia Vision von am Groaßkaufhaus odder no am Drogeriemarkt in dr Altschdadt. Do planas an Parkring um dia Altschdadt rum, und wann’s dann konkret wird, schdreitas umanand, ob ma a Parkhaus vor’m Löpsinger Tor braucha und zahla ka, dass ma vor am andra Tor notwendiger Parkplätz briecht und überhaupt. Zwoi Hotels will ma haba, a exklusiveres auf’m Döderleingelände und a preiswerteres auf’m Baywagelände. Letschderes hätt a erfolgreicha Gaschdronomafamilie aus Nearle sofort nagschdelld, aber irgend wia reagiert dr Inveschdor, der des Geländ kofft hot net, red’ irgendwas von Wohnunga überm Supermarkt, d’ Schdadt zuckt oo bloss mit di Schultra und woiß scheints von gar nix und di Nearlinger koffad si schdattdessa a Hotel in Oogschburg. Des kommt mer so vor, als wär dia Vision von dr bemannta Mars-Landung in Gefahr, weil ma si net über’d Farb von dr Raket einiga ka.
Visiona sehad halt andersch aus – do fehld in Nearle scho amole a ganz grundsätzlicha Idee, warum Leit überhaupt areisa, länger doobleiba, Parkhäuser, Hotels und dia Kassa von oos Gschäftsleit fülla sollat. Des Konzept, dass mer a scheana mittelalterlicha Altschdadt und a oinzigartiga Schdadtmauer hom, isch scho hundert Johr alt und langt net, um Leit drei Tag lang in scheane nuie Hotels feschdzumhalta – ma braucht halt amole koine drei Tag, um dia Schdadtmauer zum umrunda. Was drei Tag daura dät, wärad zum Beischpiel Konferenza in am futuristischa Konferenzzentrum mit Wellnesslandschaft, schdrukturierte Ausflugsangebote in oosra weltweit oizigartiga Geopark, ins Schdadtmauermuseum und des Bauramuseum (Verzeihung, des Museum Kulturland Ries) und viele andre Sehenswürdigkeita, dia wo bis jetzt alloi für sich no net ausroichad, um Tourischda drei Dag lang zum halta. Des sin ja alles koi nuie Idea, im oinzelna gibt’s ja scho Konferenza und gäb’s Idea für a Wellness-Center am Krankahaus, an Golfplatz, an Hoachseil-Garta odder an Freizeit-See.
Des sind abber alles ungeordnete Oinzeltoil, dia wo genau wia meine Rasierapparate, Toaschter, Waschmaschina, alte Briafkäschda und Wohnzimmerlampa an Kruschdlada ergeba und koi Gschäft mit Marke und Profil. Jetzt red i scho wia meine Verkeiferinna – odder wia a Schdadtrat, wia er reda däd, wann er reda däd, wia er reda sollt.