Jeder ka jetzt Urlaub macha
Der Tandler flüchtet vor dem Wetter in die Sonne im Herzen
Also, jetzt hot des Sauwädr jegliche Grenza überschritta: Oaschdra versaut, noch Oaschdra Schnea, earschder Mai versaut und dia Wuch der SuperGau – ‘s Schdabafeschd oo no versaut. Alle Frühlingsfeschdla, mit deane ma si scho rein psychologisch noch’m finschdra Winter widdr aufbaut, warad huier nix. Drum hab i mir was anderschds Psychologischs eifalla lossa: Flucht in den inneren Urlaub.
Do gibt’s dann meahnere Schdufa drvo. In der earschda Schdufe hoißt „innerer“Urlaub, dass ma net wegfahra muaß, sondern drhoim an exotischa Urlaubstag eilegt an oim von deane oinzelne scheane Tag zwischadurch. Wann ma’s zeitlich eirichta ka, zur Not halt glei noch Feierobend, ziagt ma sei Hawaii-Hemdle oder Sommerkloidle aus’m Ferieneck vom Schrank raus, setzt Schdroahuat und Sonnabrill auf – Perfektionischda kennad no a vollpackte Badedasch mitnemma – hockt si in a Eisdiele vor an Früchtebecher und/odder got südländisch, schprich italienisch, griachisch odder mexikanisch essa. Drnoch no an Cocktail mit am exotischa Nama (wia zum Beischpiel ‚Sex on the beach’), und scho hosch deane atlantische Tiefausläufer an scheana Urlaubsdag agluchst.
Dia nächschda Phase got no tiafer und losst ‘m Sauwäder no weniger Chanca, weil do gar koi Sonn drzua brauchsch. Sie basiert auf deam Glücksfall, dass jeder Urlaub sei Wirkung in boide Richtunga von dr Zeitschiene ausdehnt, durch Vorund Nachfreude. Beides ka ma intensiviera: Die Vorfreude isch bei mir „’s Karibik-Tischle“. Weil, im Schpädherbschd mach i a Kreizfahrt in’d Karibik und damit i des Vergnüga o richtig vor Ooga hab, schdodt jetzt in meim Wohnzimmer a kloiner Rattan-Beischdelldisch (ui vermutat richtig, a Ladahüater aus meim Lager) mit Proschpekte und Büacher, wo vorna Schdränd und Palma drauf sind, drzua a Väsle mit’rer Orchidee dinna, a gschnitzta Wasserschildkröat, dia wo i amole von Korfu mitbrocht hab und a Flasch Jamaika-Rum.
Abber o di Nachfreude von am scheana Urlaub hab i jeda Dag vor Ooga: Im Flur hängt a Foto-Collasch von am Mallorca-Urlaub mit meine Kegelbrüader, der wo ganz b’sonders luschdig war. Des kennt ma theoretisch no verschdärka mit Fotoalba, dia wo ma offo rumliega losst. Ui merkad scho: Sommerschdimmung liggt im Auge des Betrachters, und wann’s net vom Petrus kommt, muaß ma si halt selber helfa.
Übrigens: I hab grad digitale Bilderrahma im Angebot, wo Urlaubsbilder in’rer Endlos-Schloif durch zappt werad.
Der Tandler