Passad fei älle auf, was der sagad
Auch der Tandler sorgt sich um die künftige Sprachkultur
Es isch a Weisheit von biblischm Ausmaß: „Am Anfang war das Wort.“Und dia isch so vieldeitig, wias gröaßer nimme sei ka – alles Guate fangt mim Reda a, alles Schlechte scho glei erschd recht. Drum muaß ma grad am Afang aufpassa, in welcha Richtung des got, was gredt wird und sofort verhindra, dass Worte und dia drauf folgende Tata net in a komplett falscha Richtung gangad.
An nuia Afang hommer jetzt noch dera Wahl, do isch si jeder einig. Sogar dear Nuiafang selber isch scho geprägt vom Wort: Im Wahlkampf hot jeder nur no von dr AfD gredt und prompt hom dia, über dia wo ma am meischda dia Schdimm erhoba hot, meahner Schdimma kriagt, als sie si jemols selber erträumt hättat.
Und si hom mit di earschde Worte nochm Wahlergebnis scho zoigt, um was es iahne got: „Wir werden Frau Merkel oder wen auch immer jagen.“Dia wissad no gar net, wer and Regierung kommt, aber sie machad diajenige scho von vornherei zuarer Jagdbeute. Des isch des oine, was da Afang gsetzt hot. Des andre sind dia Gegademonschdranda am Wahlobad, dia wo meiner Meinung noch sowohl zoigt hom, wia ma si glei aschdecka losst von dr aggressiva Haltung, abber oo, wia ma vernünftig drgega hält. „Ganz Berlin hasst die Afd“, hom di oine gruafa. Da Hass auf Menscha sollt ma net übernemma, sonschd hom ja di Hasser quasi scho gwonna, moin i. Und di Methode von offakundige Falschaussaga o net, indeam ma von „ganz Berlin“redat, weil dia AfD ja in Berlin oo gwählt wora isch. Aber ma hot o ghöart: „Nationalismus raus aus den Köpfen.“Des passt, do beziaht ma konkret und vernünftig Schdellung, ohne auf jemanda eizumdrescha.
I bin ja dr letzschde, der wo koin Klartexschd hera will. Leit, dia wo drvo redat, andre zum „entsorga“und als „sozialen Bodensatz“asehad, muaß ma dia Schdira bieta und drgegahalta. Aber halt net auf’m gleicha Niveau, indeam ma da Gegner mit Müll gleich setzt, sondern geischdvoll: „Entsorgas earschd amole Teile von ihr’m Parteiprogramm“, wär jetzt do vielleicht a passende Antwort odder: „Bodasatz gibt’s im Kaffää, abber net in dr Gesellschaft.“Ma muaß si aschdrenga, um geischdreich und vernünftig gega dean Ton zum halta, der wo jetzt höchschwahrscheinlich in dr Politik und im ganza Land Eizug haltet. Aber wenn mer des älle duat und genau aufpassad, was mer in di nächschde Johr redad, wird beschdimmt bei viele Leit a demokratische Widerschdandskraft mobilisiert, dia wo in di letschde Johre und Jahrzehnte vielleicht a weng eigschlummert isch, weil ma dia Demokratie gar net so richtig in Gfahr gseha hot. Do bin i nämlich sicher, dass des am End von deam derzeit globala Rechtsruck und Populismus bleibt: A no schdärkerer Gega-Ruck, der wo dia zivilisierta Demokratie schdärkt.
D’r Tandler