A saubere Entscheidung

Das Nördlinger Glyphosat-Verbot begeistert den Tandler

Des mit deam Glyphosat isch scho a elendigs Elend - ned nur des Pflanzagift alloi, sondern oo, wia do ananander vorbei und drumrum gredt’ wird, während mir drhoim bei am Blick in mein aufblüahta Garta richtig unheimlich wora isch: Koi oinziga Bien odder Homml hot si do in deam Blüadameer blicka g’lossd. Wia i do amole an Baura drauf agschprocha hab, hot er prompt g’sagt: „Do redsch jetzt mim Falscha. I schpritz scho a Glyphosat, aber i bin a Ruababauer. Do gibt’s koine Blüata, drum schädigad oos oo koine Biena.“Dass ma do ja vielleicht ieber sein Ackerrand nausgschoba kennt, weil ja zum Beischpiel neinzg Prozent von älle Gwässer in Deitschland scho mit Gift, Dünger und soschdiger Chemie belaschded sin, hot er gar ned eigsäha. Was von iahm ins Wasser kommt, solld mai iahm earschd amole nochweisa. Abber wia soll a oinzelner Bauer moina, er kennd was für’d Bodareinhaltung dua, wann ma si do auf höachschder Ebene net amole einig isch? Do hot doch unlängscht der Landwirtschaftsminischder oifach dia Richtlinia von der Bundesregierung überganga und bei dr EU für dia Beibehaltung von deam Glyphosat gschdimmt. A mords Gerede hot’s do a baar Dag lang gäba, und des war’s dann oo scho widder.

So, und jetzt gibt’s a Gremium, des nimme rumredt’, sondern handfeschd des Gift verbietet. Noi, es isch koi EU-Kommission, koi Schdaadsregierung und oo koi internationaler Gerichtshof. Es isch dr Nearlinger Schdadtrat. Dia nemmad künftig in ihre Pachtverträge für landwirtschaftliche Flächa mit auf, dass do koi Glyphosat mehr ausbrocht wera deff. Fertig. Jetzt ka des ja koi flächendeckenda Lösung sei, aber a Beitrag für a saubera Umwelt isch es allemol und vor allem - es isch a Signal. Earschdens, dass si dia Schdadt ieberhaupt um da Riaser Boda sorgt und zwoitens für andere Kommuna und soschdige Bodaverpächter, dass ma do ja mitmacha kennt. Und ieberhaupt, dass ma nuie Wege beschreita ka beim Umweltschutz. Do denk i jetzt an des Drohnaturnier neilich auf’m Flugplatz, wo’s am Rande oo Agrardrohna vorgschdelld hom. Dia kännad mit Kameras aus dr Luft ieberhaupt earschd amole feschdschdella, wo z’viel odder z’weng Wasser im Boda isch, wo meahr odder wenger düngt wera muaß, wo si Schädling breit machad. Dann kasch Kügala mit natierliche Schädlingsbekämpfer awerfa, zum Beischpiel Schlupfweschpa gega da Maiszünsler. Rechtlich isch ma no ned so weit, aber des wird scho no komma. Wichtig isch, dass ma im Kopf earschd amole so weid isch und si offa fier neie Technika und Idäa zoigt. Bei mir im Lada gibt’s jetzt preisginschdig kloine Drohna für Afänger, dass ui scho amole a weng ieba kennts, eire Äcker systematisch azumfliaga. Programme, wia ma Kameras mit GPS und Tablet koordiniert, kommad schpäder.

D’r Tandler