D’Politik mit zwoi Küah erklärt
Der Tandler motiviert, bei der Wahl Demokratie zu zeigen
Als gesellschaftlicher Nabel Nördlingens schdodt mei Lada zurzeit natierlich oo im Fokus von dr Landtagswahl. Do redt ma offa ieber alle Aschpekte, oo ieber d’oigna Politikverdrossaheit. Und do hot so a junger Kerle, der wo an Packa von meine bsonders preisgünschdige Roh-CDs kofft hot, wohl für viele von seiner Generation g’redt, indeam er g’sagt hot: „I schpar mer des Wähla, weil mer ja sowieso nix ändert.“
Do hab i mi dann scho bemüßigt gfüahlt, iahm di Grundzüge vom Parteiasyschdem näher zum bringa, und zwar auf Riaser Art: „Schdell der vor, du hosch zwoi Küah und die Nochbr hot gar koine“, hab i iahm ausgmolt. „Was duat do dia oinzelne Parteia gega dieses soziale Gefälle?“ Des hot’n dann doch irgendwia interessiert und i habs’m dargschdellt: „Also, dia SPD beschduiert deine zwoi Küah und älle andre o, legt mit deane Schduira a Kuah-Finanzierungs-Programm auf, des deim Nochbra zugute kommt. Do drmit ka er si oo a Kuah koffa, dia Schduira gangad widder ra, er hot oo sei Kuah und guat isch. Dia CSU däd an Ausgleichsfond, Wiedrguatmachungstopf odder so ebbas ähnlichs finda, dein Nochbra als Härtefall deklariera und ruck-zuck käm er oo zuarer Kuah. Di Grüne dätat deine Küah erschd amole unter Naturschutz schdella, was zur artgerechta Haltung a Erweiterung des Weidelandes erforderlich macha däd. Du dädsch die Kuah auf sei agrenzada Wies schdella, dia Pacht in Naturalia, schprich mit der Milch von dera Kuah zahla und so hot jeder a Kuah doschdanda, von der er a Milch kriagt.
Dia FDP däd des ganze durch a liberales Mittelschdands-Modell lösa: Dei Nochber däd oi Kuah von dir leasa - du hättsch bloss no di halbe Betriebsausgaba und zuasätzliche Einnahma. Noch Ablauf von dera LeasingFrischt kriagsch dei Kuah widder zruck und der Nochber ka mim Gwinn vom Käs und Butter, dean wo er gmacht hot, a oigna Kuah azahla.“Mei Kunde hot si am Kopf kratzt und gsagt: „Do kommt ja ieberall faschd des Gleiche raus, aber dia oina Lösung do isch doch auf jeda Fall dia gerechteschde.“I sag jetzt net, welcha Lösung er gmoint hot, weil erschdens isch des sei Privatmeinung und zwoitens will i ja koi Wahl-Schleichwerbung macha. Jedafalls hot der Kunde mein Lada ziemlich nochdenklich verlossa und i moin schier, i hätt in seim Fall des erreicht, was am allerwichtigschda isch: Überhaupts zum Wähla zum ganga. Weil, wähla isch der Kern von dr Demokratie und genau dia wird bekanntermaßa derzeit von etliche Seita massiv agriffa.
A niedriga Wahlbeteiligung isch a gfundens Fressa für alle Demokratie-Gegner und scho alloi deswega muaß ma Eisatz zoiga.
D’r Tandler