Verkehrsübungs-Platz zwischa hoachklappte Gehschdoig
Der Tandler weiß, wie man Nördlingen am Samstag belebt
Kommt do neilich mei oina Verkeiferin aus’m Lager mit zwoi Ärm voll Winter-Anoraks. Wass’ mit deane will, will i wissa. Dia verkoffad si schlecht, drum soll mer’s runtersetza und als Aagebot vorne na hänga, sagd’s. Noi, im Gegadoil, sag i, mir machad’s tuirer. Wia’s mi agschobbt wia a Lämmle, sag i: „Des isch doch logisch – wann i mit’rer Wor nix einnimmt, mach i’s tuirer, dass meahner reikommt, odder?“No saggt sie: „Dann koffad’s ja no weniger Leit und mir nemmad no weniger ei.“No sag i: „Earschdklassig, Mädle, bewirb di als Manager bei dr Poschd, dia hom des nämlich no ned begriffa. Weil, weil abbl weniger Leid Briaf verschickad, wollad’s mim Porto jetzt auf neinzg Cent für an Briaf nauf. Ohne meahner Service, verschdodt si. Dass’ am End no weniger einemma, verschdodt scheint’s koiner bei deane.“Abber i brauch ja ned mim Finger auf andre zoiga – oos Händler in dr Altschdadt sin ja oo ned besser.
Am Samschdag, wo si des moderne Eikoff-Verhalda immer weider in da schpäda Nommidag und gar in da Oobad nei verlagert, klappt Nearle um Zwoie dia Gehschdeig hoach (manche oo frieher) und wundert si, dass oi G’schäft ums andre da Bach naa got. Grund für dia Schdradegie: Es isch ja nix los. Warum ned? Weil’d Gehschdeig hoachklappt sin. Oinzelne, dia wo do ausbrocha sin und amole bis halb viere aufglossa hom, hom des bald widder aufgäba. Grund: Es isch abbl no nix los, weil faschd koi andrer so lang auf hot. So god des scho seit Jahrzehnte, drmit isch’s feschd im „Hommer scho immer so gmacht“–Programm etabliert und hot ewiga Beschdand.
Aber i wär ja als Tandler ned dr Keenig von die Ieberlebaskünschdler, wann i ned aus jeder Misere no was rausholla kennd. Do sin doch dia Koschda für an Verkehrs-Übungsplatz im Schportpark scho auf a halba Million explodiert – wer si mit Koschdaentwicklunge a bissle auskennt, woiß, dass do ruck-zuck a ganza Million draus wird. Und des für realitätsferna Kinder-Verkehrsiebunga fern von jedm Verkehr. Wann ma jetzt dia ausgschdorbna Altschdadt am Samschdag für dia Verkehrsiebunga hernemma däd, hätt ma glei zwoi Mucka mit oiner Klapp gschlaga: Ma hätt Minimum a halba Million gschpard und dia Kinder kenndad Verkehrsregla und -verhalta glei von vornherei unter echte Bedingunga lärna, schdatt auf am agmolda Parkplatz – der Trend von dr Pädagogik got doch generell zum praxisnoha Lerna, oddr? Und ma hätt Variationsmeeglichkeita – auf’m verwaista BrettermarktBusparkplatz kenndad dia ganz Kloine earschd amole in Ruah ihre Grundiebunga macha, abber scho mit veroinzelte Autos im Hintergrund, quasi als echda Kulisse. Um da Kriagerbrunna rum kennt ma Kurvafahra und Abiaga learna, in dr Fuaßgängerzone bei dr Judagass’ korrektes Verhalta in Eimündungssituationa, und dia Fortgeschrittne kenndad scho amole a veritable Schdadtrunde dräha. I däd mei Lager oo für dia Unterrichts-Ausrüschdung zur Verfiegung schdella, nochd sin scho amole 150 000 Euro für da Umbau von am alda Kiosk midda in dr Pampa gschbard. Zeah Prozent drvo in dia Sanierung von meine Lagerräum gschdeckt dädad ja oo scho langa, do bin i bescheida. D’r Tandler