Diät für übergewichtige Geldbeutel
Der Fastenzeit-Hit: Das Schuftoslim-Programm des Tandlers
So, jetzt hommer’s widder in’d Faschdazeit g’schafft – der Begriff kommt do her, dass ma jetzad faschd a Zeit lang a weng aschpecka solld. Rein zuuufällig wird jetzt dr Markt oo widder mit vöööllig neuartige Präparate ieberschwemmt, dia wo oim des Anämma auf ganz wundersame Art oifacher macha. I brauch mi do gar net schlau drieber macha, des dean scho meine Kundinna: „Sie müaßad mer oobedingt des’Redulight’ bschdella, des wo amerikanische Models und Footballschpialer oo hom“, hot oina gsagt und v’rzählt, dass’ des normalerweise für normal Schderbliche gar ned gibt, abber kurzzeitig a leichta Ieberproduktion aufträda isch und ma jetzt a Chance hod, dra na zum komma.
„Wollad’s Model odder eher Footballschpialer wera?“, hab i’s g’froggt, wo i nochgoogelt hab. Scho in di earschde zwoi Zoila vom
Werbetexschd hab i a Reduktion von di schwäre Hoffnunga auf leichtes Anämma herbeiführa kenna: „Die Kapseln können in Kombination mit einer kalorienarmen Diät und einem gesunden Lebensstil Fett reduzieren“, hab i vorgläsa (dean Texschd gibt’s fei echt) und erläutert: „Also, bei rer Hungerdiät und am gsunda Läbensschdiel brauchads koine FootballschpialerKapsla mehr, odder?“No hot’s a Schläpple zoga und isch ganga.
Blieba isch bei mir der Gedanke, dass i als guader Tandler scho oo an deam alljährlicha Diät-Gschäft teilhaba solld. Abber wia, wo i doch scho älles amole im Agebot g’habt hab? Und scho isch mir dia Antwort zuagfloga in Form von dr nexschda Kundin, dia wo zufällig an Schrebergarta näba meim hot, dieaba am Bäumlesgraba. „Jetzt isch fei dr Früahling widder do und do kennad’s endlich dean Geschdrüpp-Dschungel,
dia SumpfbeeteWildnis und des wuchernde Pampas-Gras, des wo si älles mitanand an Schrebergarta nennad, endlich herrichta!“, hot’s mi gmahnt, und des ned zum earschda Mol.
Abber desmol hot’s mi auf a Idää brocht. I hab glei meine zwoi Verkeiferinna zammtrommelt und mir hom am Computer dean EdelProschpekt zu meim exklusiva „Schuftoslim“Programm für Diät-Tourischda entworfa. Der Inhalt im Wäsentlicha: Ein- bis DreiTagesaufenthalt auf einem privaten Natur-Areal im Anschluss an ein Naherholungs-Gebiet mit einzigartigem historischen Ambiente. Übernachtung in einer romantischen Hütte. Leibesübungen nach jahrhundertealter regionaler Tradition
mit Erdbewegungen anhand historischer Geräte, meditativer Pflanzen-Transformation und dem Genuss von appetithemmendem Wasser ohne jedwede chemischen Zusatzstoffe aus dem lokalen Erdmineral-Brunnen; alles für ganze 245 Euro pro Tag.
Auf Non-Werbal hoißt des: Ma ka in meim Schrebergartaheisle in dr Nähe von dr Schdadtmauer iebernachta, umgraba, Bemm und Hecka schneida und kriagt ausschließlich des Schlammwasser aus meim leicht vererdeta ZischternaBrunna vorgsetzt, noch deam wo oim sowieso jeglicher Appetit vergot.
A Win-Win-Situation; dia DiätTourischda nemmad ab, und wann’s bloss am Geldbeidl isch, i mach mei Gschäft und hab im Früahjohr an gepflegta Schrebergarta und d’r Tourismus isch oo widder a weng akurbelt. D’r Tandler
Tandler