Herzlischer Gliggwunsch, Saar-Geburdsdaaskind
Das Saarland feiert seinen 100. Geburtaag. Für unseren Kolumnisten Grund genug, dem kleinen Land zu gratulieren.
Zu Weihnachde war á widder se siehn, de Film „Ist das Leben nicht schön?“Dòò zeije se me Mann, wie sei Weld dääd aussiehn ohne ihne. Vásuche má sowas ach mòò mid unserm Ländsche. Hädd má nix annerschdwo abgeschnibbeld unn als Besadzungskind zu me neie Ländsche sesammegebabbd, wär Sabrigge am Siidrand vum Regierungsbezirg Trier, Perl im Kreis Saabursch, Wadern Dorf stadd Quasi-Kreisstadt, de Bostalsee im Kreis Birgefeld. Vum Aldewald gääng má e paa Schridde in die Pals uff die Schnappach weje’m billische bayerische Bier. Jeder wisd, warum de Bayrische Kohlhof so heischd. Ohne Landesgrens wär Bechhofen Stadtdääl vun Hombursch unn vun dòò nòò Zweibrigge dääd längschd widder die Eisebahn fahre. Iwwerhaubd: In Dingmerd,
Hombursch unn drumrum wäre se Pälser wie in Laudre unn Landau! Na unn? Der Saalänner-Pälser-Quadsch hängd mir sowiso zum Hals raus.
Awwer was ham’má in Wòhrhääd? E Ländsche, demm eerschd es Geld ausgang is – unn jedz die Leid. Im Saaland ware mòò bei gleischer Fläsch dreimòò so vill Inwohner wie in Luxebursch: Hoffe má, dass das nidd ball umgekehrd is. Gans realisdisch: Mir hann hie nidd‘s Paradies. Was isch awwer sunschdwo solld, wääs isch eerschd reschd nidd, wenn isch genau hingugge. Mir hann ach der Fubbes nidd needisch, wo mansche Schwaduddler uns vákaafe wolle als tybbisch saalännisch. Vun weje „má kennd änner, wo änner kennd“: Will jemand misch glawe mache, das wär sunschdwo annerschd? Odder „Mir wisse, was gudd is!“: Erfunn als Reglame forr Landsiesch-Magrine. Odder: Mir sinn die Brigg zu Frankreisch. Wär scheen, wenn’s wòhr wär. Awwer dòò ham’má noch e Haufe Aawed vòr uns, iwwer der uns hoffendlisch nidd die Lufd ausgehd. Zudemm: Was helfd’s, Midde vun Europa se sinn, wenn alles vòre, hinne, links unn reschds vòrbeifludschd unn mir nur zugugge unn uns ärjere dirfe?
Awwer freie kinne má uns doch aa! Unser Saar-Geburdsdaaskind werd 100. Ob die Vágewaldischung vun Versailles unn die Zangegeburd hann misse sinn, wie’s uff die Weld kumm is? Schnee vun gischder! Dass es sisch orndlisch gehall had, trodz allem, wie se de Flabbes mid em gemachd hann, das wolle má nidd vágesse. Dòò kinne má wirglisch uns unn unserm Ländsche graddeliere, vun Herze!