E heises Eise?

Was zählt in CoronaZeiten mehr: der Schutz der Gesundheit oder der Freiheit? Auch unser Kolumnist fragt sich das – und, ob man ein Blech voll heißer Pommes mit bloßen Händen anfassen kann.

Die Daache hann isch im Fernsehn was Intressandes – nidd gesuchd, awwer gefunn. In dá NDR-Mediathek (Markt 18. Mai) hann se ausprobierd, wie Tiefkihl-Pommfridd – gesaad hann se nadiirlisch „Pommes“– am beschde gelinge. Heises Fedd wie frihjer? Heislufd-Friteuse? Gehd beides. Awwer se hann ach welsche in de Baggowe geschob. Nòò 22 Minudde mid 200 Grad Heislufd, isch traue meine Aue nidd, sidd má in rá Groosuffnahm, wie e Fraa das Blesch mid bloose Hänn aus em Owe rausholld. Känn Labbe, känn Handschuh, nix! Mid bloose Hänn!

200 Grad!! Unn gans endspannd läscheld debei.

Jedz fròò isch misch: Kam’má sisch so abhärde, dass ämm ach so e heises Eise wie e Baggblesch mid 200 Grad nidd meh wie e Läschle endloggd? Odder steggd‘s in de Gene, so e eiskalder Panser se hann, dass das nidd aan ämm kummd? Kann nadirlisch ach sinn, die hann‘s nidd ernschd geholl unn nur ebbes vòrgespield: Ferdische Pommfridd uff‘s kalde Blesch. Gemännd, so spidzkliggerisch dääd nimmand uffpasse, unn deshalb ach niddmòò pro forma e Duuch geholl, dass die Leid nix merge. Odder ware das sowiso Fake News, Lügenpresse odder so? Wenn nidd sogaa e Váschwörung, weil irjend e dunkli Machd Deidschland will lahmleje, indemm se massehafd Leid dezu váleide dudd, sisch die Finger se vábrenne? Odder awwer: Leid de Fähler bei mir? Weil isch e Feischling bin? Dass isch das genauso kinnd, wenn isch nidd in meiner Dummhääd nur iwwervòrsischdisch dääd männe, es kinnd meine Hänn – unn dòòdemid mir – nidd gudd duun?

Gudd, má kann saan: Wenne intressierd in Corona-Zeide so e Fubbes! Sischer! Awwer all das treffd doch uff Corona aach zu: Forr‘s Wischdischde nòmmòò se saan: Isch traue meine Aue unn Ohre nidd, wenn isch siehn unn heere, wie Leid im Name vun ihrer Freihääd nidd nur mid ihrer eischner Gesundhääd spiele, sondern ach (sowiso reif zum Sterwe) mid anner Leids Läwe.

Kam’má sisch so abhärde, dass ämm so e heises Eise nidd meh endloggd wie Grinse unn Schullerzugge? Odder steggd‘s in de Gene, so e eiskalder Panser se hann, dass ämm sowas nidd nah gehd? Dòòzu passd ach, dass má‘s niddmòò needisch had, so se mache, als ob. Awwer das is sowiso nix Neies. Ledschdi Fròò: Bin isch also wirglisch e iwwervòrsischdischer Feischling unn kinnd das aach, wenn isch nidd so bleed wär? Schunn widder e heises Eise! Na ja, vábrenn isch má stadd de Finger wenischdens es Maul! So Leid, so e Weld: Mir gefalld das nidd!