Vun greeßer Tuute unn klenner Breetcher
Unserem Autor ist aufgefallen, dass es nicht nur an der Bäckereitheke immer häufiger Mogelpackungen gibt.
Massisch“bedeit „in Hülle unn Fülle“. Heit hammer awwer immer efter „viel Hüll‘ unn Müll – weenisch Füll‘ “, also auße scheen – inne kleen. In manche Bäckereie isses eenfach; doo muss ma nur kläre, ob die Tuute greeßer odder die Breetcher klenner woor sinn.
Iwwer de Vepackungsmüll im Internethannel brauche ma gar net se schwätze. Awwer aa im Supermarkt stehn in Aueheeh meischtens die scheen vepackte deire Markeware. Viel Leit menne halt, was owwe steht, wär ebbes Besseres. Doodebei iss oft grad das, was e bekannter Name hat unn „bunt“vepackt iss, inne zimmlich hohl.
Stännisch sieht ma neie Name uff Dose, Packunge unn Flasche. Schlechtes Englisch klingt noch besser wie falsches Deitsch, de Inhalt iss awwer abgesiehn vum Gewicht im beschte Fall de selwe wie vorher.
Mei ehemalische Lieblingskekse hääße seit 2021 „Perpetum“, well de Name ‚Afrika‘ rassistisch war! Die Firma hat so außer dem „u“vun „Perpetuum“aa in de Packung 33 vun 130 Gramm gespart – weenischtens de Preis iss gleich blieb.
Aa in de Politik gebt‘s e Haufe
Mogelpackunge, besonnerscht vor Wahle. Treff ich die Leit vun de Bilder uff Wahlplakate perseenlich, erkenn ich die gar net – awwer die kenne mich e Daa noo de Wahle joo aa nimmie. Viel, wo sich gut vekaafe, losse sich oft kaafe unn duun uns fa dumm vekaafe. Ich finne, ma nemmt mich unn uns all net fa voll, wammer uns metterer bubbelisch Sprooch wie „Gutes Kita-Gesetz“odder „Starkes-Familien-Gesetz“veäppelt. Bei Sprich wie „Die Rent iss sicher“iss sicher, dass weenisch iwwerisch bleibt fa die, wo e Lääwe lang geschafft hann. Unn noo‘m „Ost-Soli“bezahle ma jetzt halt beim Tanke de „Notleidende-Mineraleelwirtschaft-Soli“.
Viel vun uns kenne e Mogelpackung sinn – net nur die, wo noo‘m Abschminke e Pund abnemme. Das iss dann gleichzeitig e Gewichtsveluscht unn e Gesichtsveluscht. Zum Schluss iss aa met Creemcher nix meh se rette unn nur noch die uffgespritzte Lippe sinn „hervorraachend“. Dann leet ma sich halt unner‘s Messer.
Annere mogele met Uniforme, deire Klääder unn Anziesch odder met Titele. Bei manchem „Dokter“odder mancher „Doktersch“hann ich so mei Probleme – meh wie die! Unn iwwer Orde hat de Gustav Heinemann gesaat: „De eerschte kriet ma, well ma noch kenner hat; alle spätere, well ma schun enner hat“unn „Meer duun all lääd, wo sich ohne Orde an de Bruscht halwer nackisch fiehle“.
Unser Autor Günter Hussong kommt aus Kirkel-Neuhäusel. Mehr Infos und Pubilikationen gibt es im Internet unter: www.mundart-saar.de