Én de heegscht Fleeteteen
Ein Termin in Saarlouis weckte bei unserer Autorin Erinnerungen an die Zeit, in der sie lernte, Blockflöte zu spielen.
Musik zur Marktzeit“soo hääscht e Veranschdaltóngsraaih vaan der „Orgelbauverein St. Ludwig Saarlouis“. Mei Freindin Ursula ónn ich, mier durfden dòò voor paar Wóchen én de Évangeelich Kirch Texde é Mundart leesen – ónn zwaar bei e Konzert mét alt Inschtrumenten, voor allem aach mét histoorich Blockfleeten. Dat hott mich ganz besónnerscht gefreit. Schließlich geheeren ich jò noch zu die Genneratioone vaa saarlännich Mäddcher ó Buuwen, wó ball allegaar én de School Blockfleet schbille gelehrt hann. Dòò kómmen dann Erénneróngen aan die aaije „Blockfleet-Karriäär“. Mei eerscht Fleeteteen, die hoddich én de Volksschool beibraat kriet. Dat misst só 1950/51 én die zwätt odder drétt Klass gewee sénn. Métmachen durft ich dòòmòòls bei de Frollein Schulz. Die hott die Klass ónner óns. Ich gesinn haut noch, wie mier – meh wie 50 Mäddcher – é lank Bankraaihen zwaai ónn zwaai neewenanner mét ónser Blockfleeten én de Hänn gesétzt hann.
Ówwet Gimnaasium, dòò éset da weider gang – nòò ónser Unterricht, awwer én ónser Schoolerhaus. Naddierlich freiwéllich! Die eerscht Jòhre, dòò wòòr ich én de Fleetegrupp vaan de Frollein Harry ónn hernòò bés zum Abituur bei de Frollein Huber. Ó bei die, dòò hann ich dann aach gelehrt, Altfleet se schbillen. Noch gäär erénnern ich mich aan die Hauskonzerte bei sie derhemm sesamme mét Klassekameraadinnen – ónn aach e paar Buuwe wòòren dabei. Ó wie mier Mäddcher bei ónser Abituurfeier dòòmòòls én ónser Musiksaal musizieren durfden, dòò hott de Direktoorin taatsächlich erlaubt, dat die zwaai odder drei Buuwen métgechbillt hodden. Ónn dat hott sóggaar dernòò én de Zeidóng geschdann. Dat wòòren noch Zeiten!
Ó wie mier dat alles nòò t Konzert durch der Kopp geht, dòò machen ich mich óff de Suuch nòò mein Blockfleetesammlóng. Aauser Sópraan- ónn Altfleeten, dòò fénnen ich aach noch mei Ténoorfleet. Die hoddich schbille gelehrt dòòmòòls é Saarbrécken aan de „ Pädagoogisch Hoochschool“, woo ich schduddiert hott. Iwwrijjens: Jeedfoorääner, woo dòòmòòls Lehring odder Lehrer aan e
Volksschool wóllt génn, deer sóllt nòò Mijjelichkätt én Inschtrument schbillen. Ó soo hott da manch ääner Blockfleet schbille gelehrt, deer wó sónscht wómijjelich niemòòls óff die Idee kómm wäär. Ónn dòò móss ich graad médden Aauezwénkern aa mei Mann denken.
Karin Peter lebt in Wadgassen und schreibt in der alten moselfränkischen Mundart von Saarlouis.