Bloos e Film – odder forrs Läwe lerne?
Wer beim Filmgucken aufpasst, lernt, wo der Unfrieden auf der Welt herkommt, meint unser Mundartkolumnist.
Das is doch bloos e Film! Der Sadz solld misch Knirbs in die Wirglischkääd seriggholle, wie má mei eerschder Film „Das doppelte Lottchen“zu nah gang is. Bloos e Film? Also nix zum Lerne forrs Läwe? Ach nidd aus z.B.: Heidi, Pünktchen und Anton, Mein großer Freund Shane (mei eerschder mit Colts)? Egal! Má bleibd känn „klään Kind“unn will ebbes „Aanspruchsvolles“forr Erwachsne siehn. Kaum waa isch zwölf, is in Mòòlschd es neie Edelkino Camera mei eerschd Adress worr. Lerne kinne hädd isch u.a. aus drei dòòmòls schunn uralde Klassiger, „Prädikat besonders wertvoll“, hann das awwer eerschd vill späder begriff.
De allereerschde Film im Camera: „12 Uhr mittags“. Forrs Läwe se lerne: Wenn's ernschd werd, kinne Freinde selde werre. Dann die rischdisch Frau se hann, is e Riesegligg. Scheinbaa lusdischer Nr. 2 „Die Ferien des Monsieur Hulot“: De Jacques Tati als guddmiidischer Urlauber, demm mansches schief gehd. Se lerne: Wie schnell má als beklobbder Spinner bloos noch die kald Schuller gezeid kridd, obwohl má's immer nur gudd gemännd had. Sogaa
Nr. 3, die Komödie „Arsen und Spitzenhäubchen“is e Lehrstigg: Ach reifere Dame, wo sisch goldisch uffihre, is nidd immer se traue. Es Gifd kinnd schunn gemischd sinn, mid demm má ihr näägschdi Leisch im Keller werd. Unn wenn ach Arsen selde servierd werd, gifdische Worde kinne ämm aach umschmeise.
Jòhrzehnde sinn vágang, es Camera umgezòh, Kinos váschwunn, neie kumm. Fernsehn, DVDs & Co. biede kläänes Kino vum Sofa aus. Unn banalere
Filme schade kaum, wem'má debei schlòòfd. Trodzdemm waa's faschd e Schogg, wie's má gedämmerd had: Egal, wie bleed e Film is, ebbes lerne kam'má doch. Forr bloos ään Beispiel raussegreife, wo Dausende Drähbiischer spannend mache soll: Jemand fassd ebbes kroddefalsch uff, was á sidd, heerd, vázehld kridd; reimd sisch es denkbaa Schlimmschde sereschd unn is dief beleidischd. Mid paa Worde wär alles rischdischsestelle. Awwer jedz zähld bloos sei eischni Vábòhrdhääd, unn es heischd: Brauchsch má gaanix se saan! Isch wääs, was isch wääs! Hann doch Aue im Kobb! – unn ähnlische Sprisch.
Egal wie lang unn dief Vátraue, Lieb, Freindschafd waa: Alles im Dreggäämer! Im Film derf's das, semol, wenn's romandisch zugehd unn se am Enn noch die Kurv krien. Awwer wenn nidd? Is es dann „bloos e Film“? Odder wie im Läwe? Dann ahnd má immerhin, wo in dá groos Weld de Unfriede härkummd.
Peter Eckert