Antipodisches

Gohscht du in a Reschtaurant, möchtescht – allgemein bekannt – dass me freundlich dich empfängt und dich zu deim Tisch nabrängt und des Bier sowie de Wei‘ schenkt in saubre Gläser ei; de Brate à la Zwiebelroscht au koi klois Vermöge koscht. Am End springt no a Schnäpsle raus.

Ein Präsent vom Chef vom Haus. So lauft‘s bei uns. Doch höret zu: Gräbscht a tiefes Loch jetzt du, ganz tief und zwar vom Hafe aus, kommscht in Auschtralien du raus. Stohscht du det dann auf dem Bode, bisch du bei den Antipode.

Det hent se jetzt a Reschtaurant, die ‚Schwäbische‘ gab es bekannt. Quasi a Antipodium.

Det lauft des älles anderschtrum: Kellner zoiget unter Fluche, wo du deinen Tisch sottscht suche. Auf Nackensteak vom Känguru muscht warte eine Stunde du.

Als Getränk serviert me dir kalte Kaffee, warmes Bier.

Und als Zugabe vom Haus schickt me dich zum Spüle naus. Karen‘s Diner, des isch in.

Schare strömet täglich hin.

Wer in Sydney koin Idiot isch: Karen‘s Diner! Antipodisch!

Bloß bei Karen’s alle fluchet, weil se scho seit Woche suchet en Teschter für ihr Reschtaurent, und sie bis heut koin g’funde hent, obwohl für ihn gesichert sei: Service, Speis und Trank sind frei!