補選

Next Magazine - - 八卦陣 -

年年宵,政黨都會出盡法寶,吸引市民買佢哋嘅產品籌錢。為咗聚焦三月嘅立法會補選,民主派喺今年年宵自然以反DQ做主打。一啲成為DQ主角嘅政黨,亦冇被打沉,繼續上水推出產品。社記方面,舊年長毛梁國雄話自己可能係最後一年,以立法會議員身份搞年宵,點知一語成讖。今年嘅產品,就有印住毛哥樣,但對眼被「DISQUALIFIED」(DQ)字樣遮住嘅T恤。劉小麗嘅「小麗民主教室」,亦會推出布袋同T恤,當中仲有布袋係劉小麗親筆畫咁話。 上年出自家製圍裙嘅眾志,今年再接再厲,推出印有「早唞啦你」字句同幾個保皇黨議員樣貌嘅圍裙。佢哋又出行李牌,牌上嘅字原本係「小心比人話勾結外國勢力」,但被拒印製,時間趕急之下,惟有改做「廢青去旅行」。冇被波及嘅民主派政黨,亦都出手力谷3.11補選。例如民主黨喺維園嘅年宵攤位,每晚都會讓俾各民主派候選人做宣傳站,爭取市民支持。公民黨就推出「吹票打威權」產品,寓意香港人「吹」起民主派選票同「對準政拳(權)」,三名民主派候選人都會現身公民黨維園攤位做宣傳。

Newspapers in Chinese (Traditional)

Newspapers from Hong Kong

© PressReader. All rights reserved.