Мәтіні Елена Гурина фото Рүстем Жанғазин, Сәуле Дүкенбаева
Кімде-кім сүйікті ісімен айналысатын болса, сол адам бақытты. Ал біздің кейіпкерлеріміз — астаналық бортсеріктер сияқты, сүйікті ісі мен жұмысы бір болатындар, сірә, екі есе бақытты болса керек. Айтпақшы, егер сіздер сол адамдармен жақынырақ танысқыларыңыз келсе, онда Астанаға, ЭКСПО-2017 халықаралық көрмесіне хош келдіңіздер!
Жанна Коротковская
Бортсерік-супервайзер
Аспан мені әрқашан өзіне тартып тұратын еді, сондықтан мен әуел бастан оған жақын болуды және өз өмірімді авиацияға арнауды ұйғардым. «Эйр Астанада» жұмыс істеуге мен жолаушыларға жерде қызмет көрсететін агент болып келдім. Бұл Астанада 2010 жылы болған еді. Рейстен соң рейсті, экипаждан соң экипажды қарсы алып, шығарып салумен айналысқан мен ұшу туралы армандай бастадым. Менің арманым орындалды: қажетті конкурстан өткеннен кейін бортсерік қызметіне ауыстым! Содан кейін оқыдым және ең бірінші дербес рейске шықтым. Қатты толқыдым, бірақ бәрі де ойдағыдай өтті. Алдымен мен жай ғана бортсерік, содан кейін экономикалық кластың аға бортсерігі болсам, ал қазір бортсеріксупервайзермін. Менің жұмысым әрқашан шымыр да ширақ болуды талап етеді, сондықтан мен фитнеспен белсенді айналыса бастадым. Мен өзім үшін crossfit аштым және тіпті клубтық, жеке және жалпы республикалық жарыстарда көптеген марапаттарға ие болдым. Кейде рейстен ұшып келе салысымен, бірден жаттығуға баруға тура келеді. Бортсеріктің киімімен және қолыңа шабадан ұстап, зал арқылы киім шешетін орынға қарай өтесің. Бұрын клуб қызметкерлері мен келушілер: «Мына бойжеткен, мүмкін, ғимаратты шатастырып алған шығар, оған әуежайға бару керек емес пе?» – деп аң-таң болатын. Қазір үйреніп кетсе керек. Спорт пен авиация мен үшін — өмір! Жаттығулар өзіңді ширақ ұстауға көмектеседі және тәртіпке салады. Төзімділік пен мақсатқа ұмтылу сияқты қасиеттерді мен бойыма дәл осы спорт залынан сіңірдім, бұл қасиеттер менің жұмысыма қатты көмектеседі.