Өздеріңіз үшін Қазақстанды ашыңыздар
Астанада мұражайлар мен галереялар біршама көп. Қазақстан Республикасының Ұлттық мұражайы тас дәуірінен бастап ғарыш дәуіріне дейінгі елдің тарихы мен мәдениеті туралы баяндап береді. Түрлі залдарда қазақтың төл киіз үйімен этнографиялық коллекция қойылған. Мұражайда Астана тарихына, Қазақстанның тәуелсіздігіне арналған залдар да бар. Қазіргі заманның өнерін көрсететін бай коллекция да осында орналасқан.
Қазақстан аумағынан табылған ежелгі артефактілер мен зергерлік бұйымдар Алтын залына қойылған. Алтын қару-жарақ асынған жауынгер — әйгілі Алтын Адам коллекцияның асыл қазынасы болып табылады.
Қазақстанның қалған бөлігімен танысу үшін ашық аспан астындағы мұражай — «Атамекен» этно-мемориалдық кешеніне барыңыздар. Онда елдегі негізгі қалалардың таулармен, шөлдермен және далалармен, сондай-ақ Каспий теңізімен бірге бейнеленген миниатюрадағы алуан түрлі пейзаждарын көруге болады.
Астанамен танысуды жалғастыру
Қазақстанның жаңа елордасының жобасы жасыл желекке оранған аумақтарды да қамтиды. Сондай орындардың бірі — қала қонақтары мен тұрғындарына кеңінен танымал болған Есіл өзенінің жағалауы. Жағалауда қайықпен серуендеуге тапсырыс беруге және, жеткілікті дәрежеде батыл болсаңыздар, астаналық жағажайлардың бірінен өзен суына бір сүңгіп шығуларыңызға да болады.
Өзен жағасының сол жақ қапталына орналасқан Орталық саябақ — қаладағы ең адам көп жиналатын орындардың бірі. Саябақта көлеңкелі соқпақтар, әткеншектер мен кәуап сататын дүңгіршектер орналасқан алаңдар бар, жаз айларының жылы кештерінде саябаққа
адамдар көп келеді. Жерұйық саябағы — қаладағы ең жасыл саябақтардың бірі, онда мыңдаған ересек ағаштар, велосипед тебу мен жүгіруге арналған сүрлеу жолдар, тағы да сіздердің жартасқа өрмелеу машықтарыңызды тексеретін айлалы арқан жолы да бар.
«Астана Опера» жоғары мәдениетті сүйетіндерді ләззатқа бөлендіреді. Астаналық театрдың репертуарында «Дон Кихот» және «Мадам Баттерфляй» сияқты классикалық опералар мен спектакльдер, сондай-ақ жергілікті қойылымдар да бар: «Қаракөз» балеті — қазақтың Ромеосы мен Джульеттасының, ал «Қыз Жібек» операсы армандарына жете алмаған бақытсыз ғашықтардың тарихын баяндайды, операның көрінісіне кәдімгі тірі аттар мен түйелер қатысады.
Қала орталығында орналасқан «Керемет» монша кешенінде ер адамдар мен әйелдерге арналған жеке-жеке бассейндер, фин, орыс және түрік моншалары бар, оларда, су процедураларымен қатар, массаж және басқа да спапроцедураларды алуға болады.
Астанада әлемнің түрлі-түрлі тағамдарын ұсынатын кафелер мен ресторандар өте көп. Классикалық қазақ тағамының дәмін қазіргі замандағы стильде татып көру үшін таңдаулы «Арнау» ресторанына барыңыздар да, әр түрлі тәсілдермен дайындалған жылқы етін жеп, дәстүрлі ұлттық сусындар — бие сүтінен ашытылған қымыз бен түйе сүтінен дайындалған шұбаттан ішіп көріңіздер.