Мәтіні Елена Гурина фото Елена Гурина, Ғалымжан Жалаири, Shutterstock
Аджарияның әкімшілік орталығы — Батумиді бүкіл әлем туристері керемет ұнатады. Климаты жұмсақ. Бір жағынан — Қара теңіз, екінші жағынан тау көрінеді, дәмді тағам және, әрине, жергілікті тұрғындардың өзгеше қонақжайлылығы ежелден-ақ қаланың даңқын шығарған. Бірақ бірде-бір әңгіме мен фотосурет осы жерлердің ғажайып көріністерін жеткізе алмайды, сондықтан сол кереметтерді осында келіп, өз көздеріңізбен көрген дұрыс болады.
1. Теңіз және Батуми жағалауы
Демалушылар Батумиге, ең алдымен, теңізге шомылу үшін барады. Жергілікті жағажайлардағы малтатастар ірі, әрі жайпақ, сондықтан аяққа батпайды және олардың үстіне сүлгіні жайып жіберіп, күнге қыздырынуға да болады. Толыққанды демалу үшін жаныңызға не керек болса, солардың барлығы табылатын жер — Батуми бульвары, бұл — ұзындығы 15 км-ге созылатын Еуропадағы ең үлкен жағалау. Жағалауды бойлай керектілердің бәрі де орналасқан: жағажайлар, саябақтар, серуендететін катерлер аймағы, аспа жол станциясы, балық тағамдарын ұсынатын ресторандар мен кафелер, теңіз айлағы және, әрине, жергілікті көз тартатын орындар — «Али және Нино» мүсіні, бірегей архитектуралық нысандар, Әліпбилік мұнара, шолу доңғалағы, атақты чача сусыны берілетін субұрқақ та осында. Барынша қолайлы болуы үшін бульварды бойлай велосипедтерді жалға беретін орындары бар кең велосипед жолы өтеді. Егер бульвармен көз тартарлық орындардан қарама-қарсы жаққа қарай жүрсеңіздер, жаңа құрылыстарға, әуежайға және тіпті грузин-түрік шекарасына дейін жетесіздер, бульвардың осы бөлігі Жаңа аймақ аталады. Бульварда сондай-ақ өзіңмен бірге әкетуге болатын кофе сататын дүңгіршектер, кәдесыйлық шағын дүкендер, балаларға арналған алаңдар орналасқан, бірақ ең бастысы, бульвармен күндіз-түні мүлде қауіпсіз серуендеп жүре беруге болады, Батуми қаласы да дәл сондай тып-тыныш, өйткені ол әлемдегі ең қауіпсіз қалалардың ондығына кіреді. Түнде әсем жарықтар бульварды құлпыртып жібереді. Тіпті жаңбыр жауғанда да ол көркемдігін жоғалтпайды.