2. Бәрі де — жап-жақын!
Батумидің ең басты артықшылығы — мұнда бәрі де жап-жақын орналасқан, әрі қаланы жаяу аралап шығуға болады. Жергілікті көлік жүргізушілер өте мұқият, әрі ізетті, әрқашан жаяу жүргіншілерге жол береді, ал қаланың өзі өте ықшам. Батуми түсінікті және ыңғайлы жоспарланған, мұнда барлығы, соның ішінде үйлердің нөмірлері де теңізден басталады, сондықтан қалада адасу қиын. Ескі қала біршама үлкен, серуендеп, ұзақ уақыт жүре беруге болады, әрі өзіңіз үшін әйтеуір бір жаңа нәрсені ашып отырасыз. Тіпті кино түсіретін топқа да тап болуларыңыз мүмкін: Батумидің көрікті кескін-келбеті әр елдердің кинематографистерін өзіне тартып тұрады. Біз, мәселен, сол жерде Болливудтан келген топты кезіктірдік.
Ескі қалада мүлде өзгеше жаңа орындар бар, мәселен, атақты
Пьяцца алаңы. Бұл — тозығы жеткен аудандарды қалпына келтіру бағдарламасының аясында жасалған шағын Италия. Жалпы батумиліктер итальяндықтарға қатты еліктейді, сондықтан мұнда итальянша аталатын кафелер, дүкендер, ресторандар және т.б. өте көп. Өзінің архитектурасымен, витраждарымен, мозаикасымен, күмбездерімен осы алаң Венециядағы атақты Сан-марконы еске түсіреді. Алаңда ресторандар, кафелер және тіпті сағаты бар мұнарадағы қонақүй де орналасқан. Пьяцца алаңында әлем таныған жұлдыздар өнер көрсетеді, солардың қатарында Пласидо Доминго мен Стинг те болды.