5. Шарап және гастрономиялық туризм

Грузин тағамы мен сусындары, ішімдіктері туралы ұзақ айта беруге болады, бірақ Батумиден сіздер міндетті түрде ішіне жұмыртқа салған, қайық түріндегі әйгілі аджар хачапуриінің дәмін татыңыздар. Ең кішкентайына тапсырыс бергендеріңіз дұрыс болады, өйткені бір адам оған тойып қалады да, күні бойы соның тоқтығымен жүре береді. Әдетте келген адамдардың барлығы «Аджариялық хачапури үйіне» барады, сонда оны қалай дайындайтынын көруге де болады. Бірақ кез келген батумилік сіздерге хачапури немесе хинкаль дайындайтын өздерінің сүйікті асханасын ұсынулары мүмкін, олардың тағамдары да дәмді және арзан. Батумиде өзгеше дизайндағы қызықты төлтума ресторандар өте көп, олардан сән-салтанатты фольклорлық шоуларды тамашалай аласыздар. Солардың бірі — «Мегрул-лазури», оның залдары ескі қорғанның ішкі көріністеріне сәйкестендіріліп стильдендірілген. Қалада балық тағамдарын ұсынатын ресторандар да бар: міндетті түрде қаратеңіздік барабульканың, ставрида мен кефальдың дәмін татыңыздар. Әрине, жүзімнің жергілікті цоликаури және чхавери сорттарынан дайындайтын аджар шарабын ішіп көріңіздер. Кеда селосындағы «Аджариялық шарап үйіне» барыңыздар, бұл — шарап қоймасының үстіне шыны еден төселген бірегей кешен. Ең бастысы, кетер алдында, қайта оралу үшін теңізге тиын тастауды ұмытпаңыздар, ал ғажайып Батумиге міндетті түрде қайта оралғыларыңыз келетіні анық!