Мәтіні Алина Краснова фото Shutterstock
Санкт-петербург бір кездері Ресей империясының астанасы болды. Сол замандарда бірнеше сән-салтанатты жазғы резиденциялар салынып, солар бүгінде қаланың негізгі көз тартатын орындарының тізіміне енгізілді. Сонымен, мәртебелі патша ағзамдар қай жерде демалуды ұнатқан екен?
Петергоф
Бүгінгі заманғы Петербургтің ең айшықты жерлерінің бірі — Петергофтың құрылысы Финн шығанағының бойымен саяхат жасағанда Петр І аялдайтын шағын сарайдан басталды. Петергоф атауының өзі «Петр сарайы» болып аударылады.
Императордың мәртебесі мен кең құлашына сай келетін қонысты тұрғызу
1710 жылы басталды. Қала сыртындағы резиденция содан 13 жыл өткеннен кейін салтанатты түрде ашылды. Әр жылдарда Петергофтың құрылысы мен жайластырылуына Растрелли, Леблон, Воронихин, Кваренги және сол заманның басқа да атақты шеберлері, сондай-ақ сәулетшілер мен инженерлерге өзі салған суреттері мен сызбаларын ұсына отырып, Петр І-нің өзі де тікелей атсалысты. Императордың қолы парктегі түзу және айқын сызықтардан байқалып тұр, олардан Петр І сияқты техникалық ғылымдарға бейім адамды тануға болады.
Петергоф, өзінің сарайларынан басқа, бірнеше ондықтармен саналатын ғажайып субұрқақтарымен де белгілі. Бір қызығы, парктің аумағында тұсынан өтіп бара жатқан адамдарға кенеттен су шашатын бірнеше қуақы субұрқақ та бар. Содан бері бірнеше ғасырлар өтсе де, ол өзінің ғажабын жоғалтпаған — үстеріне кенеттен су шашыраған ересектер де балаша мәз болады.
Петергофты Версальмен жиі салыстырып жатады, бірақ Санкт-петербург қаласының тұрғындары француз резиденциясының ресейлік резиденциядан әлдеқайда төмен екеніне нық сенімді. Солай ма, солай емес пе — ол даулы мәселе, бірақ фактінің аты факт: Петергоф бүкіл әлемдегі ең жақсы парк ансамбльдерінің бірі болып табылады!