ҰШУҒА ДАЙЫНДАЛУ
АВИАБИЛЕТТІ БРОНДАУ
Ұшудың бағасын білу, үйден немесе кеңседен шықпастан авиабилетті брондау немесе ресімдеу үшін сіздер: + 7 (727) 244 44 7 (Алматы қ-сы) немесе 58 44 77 (Қазақстанның басқа қалалары) телефондары арқылы авиакомпанияның брондау және ақпарат орталығымен хабарласа аласыздар.
АВИАБИЛЕТТІ САТЫП АЛУ
Авиабилетті ресімдеу кезінде аты-жөніңіз бен тегіңіздің дұрыс жазылғанына назар аудару қажет. Кейбір елдердің талаптары бойынша, қайту кезіне қарай паспорттың қолданылу мерзімі 6 айдан аз болмауы тиіс.
Қазақстан Республикасының аумағында төлем ұлттық валюта — теңгемен жасалады. Сатудың меншікті кеңселерінде ұшуға қолма-қол ақшамен де, сондай-ақ төлем картасымен де, қолма-қол жасалмайтын төлеммен де, Homebank, Kaspi.kz порталдары, «Казком», «Сбербанк России» серіктес-банктері немесе «Касса 24», QIWI төлем терминалдары арқылы төлеуге болады.
Авиакомпанияның airastana.com корпоративтік веб-сайтында авиабилетке төлем жасау үшін сіздер қолданыстағы кредиттік немесе дебиттік картаны пайдалана аласыздар. «Эйр Астана» авиакомпаниясы кез келген банктің Visa, Mastercard және American Express карталарын белгілі бір шектеулермен төлеуге қабылдайды. Төлем жасағаннан кейін сіздер ресімдеу кезінде көрсетілген электронды адреске авиабилет аласыздар.
ТАРИФТЕР
Авиакомпания жастары 25-тен төмен және 60-тан жоғары жолаушыларға арналған арнайы тарифті қоса есептегенде тарифтердің түр-түрін ұсынады.
* Делиге/ден бағыты бойынша 28 жасқа толмаған жолаушылар үшін арнайы тариф қолданылады. Халықаралық рейстерде:
-Жеке орын алмайтын және ересек жолаушы алып жүретін 2 жасқа дейінгі бір бала — тегін; бірақ кейбір халықаралық рейстерде әуежайдың алымдарын төлеу қажет болады.
- Жеке орын беру арқылы 2 жасқа дейінгі балаларды тасымалдау – алып жүретін ересек жолаушының тиісті тарифінің 50% мөлшеріндегі төлемі;
- Бір ересек жолаушы алып жүретін 2-ден 12 жасқа дейінгі әр балаға — алып жүретін ересек жолаушының тиісті тарифінің 50% мөлшеріндегі төлемі;
Ішкі рейстерде:
- Жеке орын берусіз 2 жасқа дейінгі бір баланы тасымалдау – тегін;
- Жолаушы ертіп жүретін 2 жасқа дейінгі басқа балаларды тасымалдау — толық тарифтің 50% мөлшеріндегі төлемі және жеке орын беру;
- 2-ден 15 жасқа дейінгі балаларды тасымалдау – толық тарифтің 50% мөлшеріндегі төлемі.
*Ескерту. Төлем жасаусыз ұшатын балаларға жолжүкті тегін тасымалдау құқығы мен салонда жеке орын берілмейді. Біздің арнайы ұсыныстарымыз туралы ақпаратты www. airastana.com адресінен табасыздар.
РЕЙСТЕРГЕ ТІРКЕУ
Халықаралық бағыттардағы рейске тіркеу ұшудан 3 сағат бұрын және ішкі рейстерге тіркеу ұшудан 2 сағат бұрын ашылады. Ұшуға 40 минут қалғанда тіркеу жабылады. Ұшаққа отырғызу ұшуға 15 минут қалғанда аяқталады.
Кешіккен жолаушылар авиабилеттерін басқа рейске ауыстырулары қажет. Қазақстан аумағында тасымалдау үшін жеке басты куәландыруға жарамды болып табылатын құжаттар: паспорт, жеке куәлік, шетелдіктің Қазақстан Республикасындағы ықтиярхаты, азаматтығы жоқ адамның куәлігі, босқынның куәлігі, туу туралы куәлік (16 жасқа толмаған адамдар үшін), ҚР қызметтік паспорты, қайтуға берілетін куәлік, ҚР теңізшісінің жеке куәлігі.
Ұшуға шығатын орын ұшуға 15 минут қалғанда жабылады.
ЖОЛЖҮК
«Эйр Астана» рейстеріндегі бір жолжүк орнының ең жоғары салмағы 32 кг/70 фунттан аспауы тиіс. «Эйр Астана» белгіленген нормалардан асатын салмақтағы жолжүкті тасымалдауға қабылдамайды. Әуежайға салмағы 32 кг-дан асатын бір жолжүк орнымен келетін жолаушылар әрқайсысының салмағы белгіленген нормалардан аспайтындай етіп, салмақты өзінің жолжүк орындары бойынша бөліп орналастыруы керек.
Көлемді немесе ірі габаритті жолжүкті тасымалдаған жағдайда, оны тасымалдауға берілетін рұқсатты растау үшін сіз special.services@ airastana.com сайтына жазуыңыз қажет .
ҚАУІПТІ ЖҮКТЕР
Осы бөлімде жолаушылар жеке пайдалану үшін тасымалдайтын, портативті электрондық құрылғыларға — сағаттарға, калькуляторларға, фотокамераларға, ұялы телефондарға, ноутбуктерге, бейне камераларға, медициналық құрылғыларға және т.б. арналған қосалқы литий батареяларына қатысты маңызды ақпарат мазмұндалады.
1) Қосалқы литий батареяларын (литий-иондық және литий-металл батареяларын қоса алғанда) тек қол жүгінде ғана тасымалдауға рұқсат етіледі.
2) Әрбір кіріктірілген немесе қосалқы батарея мына талаптарға сай болуы тиіс: литий-металл батареялар үшін литийдің құрамы 2 граммнан аспауы керек; немесе литий-иондық батареялар үшін, үлестік қуаты — 100 ватт/сағаттан артық емес.
* Параметрлері осы тармақта көрсетілген, кіріктірілген литий батареялары мен қосалқы батареялары бар портативті электрондық құрылғыларды тасымалдау үшін алдын ала рұқсат талап етілмейді.
3) Қол жүгіндегі қосалқы литий батареялары айқас тұйықталуды болдырмау үшін жеке қорғалуы тиіс. Батареялар не өндірушінің түпнұсқалық қаптамасында болуы тиіс, немесе олардың клеммалары оқшаулануы керек, мәселен, оқшаулағыш таспамен желімденуі қажет.
* «Эйр Астана» АҚ алдын ала рұқсаты мына параметрлердегі кіріктірмелі литий батареялары мен қосалқы батареялары бар портативті электрондық құрылғыларды (медициналықтарды қоса алғанда) тасымалдау үшін талап етілмейді: литий-металл батареялар үшін — литийдің құрамы 2-ден 8 граммға дейін; литий-иондық батареялар үшін — үлестік қуаты 100-ден 160 wh-ға дейін.
Осы абзацта көрсетілген шектерден асатын, кіріктірмелі литий батареялары мен қосалқы батареялары бар портативті электрондық құрылғылырды жолаушылардың жолжүгінде тасымалдауға тыиым салынады.
БОРТТАҒЫ ТАМАҚ
Бағытты және маусымдық өнімдерді ескере отырып, біз сіздерге түрлі-түрлі тағамдар ұсынамыз. Ал егер сіздердің қайсыбір диеталық талаптарыңыз болса, онда біздің арнайы ас мәзіріміз бар. Арнайы тамаққа ұшудан ең кемі 24 сағат бұрын тапсырыс беруге болады.
ХАЙУАНАТТАРДЫ РЕЙСТЕ ТАСЫМАЛДАУ
«Эйр Астана» жолаушыларына салмағы 8 кг-дан аспайтын шағын денелі мысықтарды, иттерді, балықтар мен тасбақаларды салонға өздерімен бірге алуларына рұқсат етіледі (PETC). Ұсақ балықтарды тасымалдау кезінде жолаушылар олардың санын, контейнердің көлемі мен салмағын, сондай-ақ жалпы салмағын көрсетулері тиіс.
Салмағы 8 кг-дан асатын мысықтар мен иттерді ұшақтың жүк бөліктерінде тасымалдауға болады (AVIH).
Құстар мен кеміргіштерді авиажүкқұжат ресімдеу арқылы әуе кемесінің тек жүк бөліктерінде ғана тасымалдауға рұқсат етіледі (cargo@ airastana.com).
Тасымалдау үшін саяхат бюросындағы өзіңіздің агентіңізге хабарлауыңыз немесе рейсіңіз ұшардан кемі 24 сағат бұрын «Эйр Астананың» арнайы қызмет көрсету секциясына (special.services@ airastana.com) ақпарат жіберуіңіз қажет.
Хайуанатты ұшақ салонында тасымалдауға қойылатын талаптар
• Сіздің хайуанатыңыздың ветеринарлық паспорты • Ветеринарлық куәлігі
• Хайуанатты сәйкестендіруге арналған микрочип немесе татуировка (европалық елдер үшін*)
* Қазақстан аумағында немесе Ресейге сапар кезінде 3 тармақ міндетті емес.
Жоғарыда аталған барлық құжаттарды сіздің хайуанатыңызды тасымалдауға жазған өтініміңізді тіркеу кезінде тікелей ұшудың алдында көрсету талап етіледі.
Аквариумдағы балықтарды тасымалдауға сұраныс жасағанда, ыдыс сыиымдылығының көлемі, балықтардың саны мен салмағы көрсетілуі тиіс (ыдыспен қоса 8 кг-дан аспауы керек). Ұсақ балықтар, тасымалдау үшін қажет ең аз мөлшердегі — 100 мл су құйылған, қақпағы бар (ауа кіретін тесіктер жасалған) арнайы шыны құтыларда тасымалданады. Балықтарды пластикалық пакеттер мен аквариумдарда тасымалдауға қатаң тыйым салынады.
PETC үшін контейнердің салмағын қоса есептегенде ең жоғары салмақ 8 кг-ды құрайды (17 фунт). Бір жолаушыға тек бір хайуанат салынған бір контейнерді ғана тасымалдауға рұқсат етіледі.
Ұшақ бортында қауіпсіз сақтауды қамтамасыз ету үшін, контейнердің ең жоғары көлемдері — A320/A321/B757/ B767 үлгісіндегі ұшақтарға – 30 x 47 x 27 см-ге және Е190 ұшағына 29 x 43 x 26 см-ге тең.
AVIH — жүк бөліктерінде тасымалданатын хайуанаттар
AVIH тасымалы кезінде, контейнердің салмағын қоса есептегенде, ең жоғары салмақ 50 кг-дан аспауы тиіс. Олай болмаған жағдайда, хайуанаттар авиациялық жолжүк ресімдеу арқылы жүк есебінде тасымалдауға қабылданады. Салмағы 40 кг-дан асатын хайуанаттарды берік ағаш контейнерлерде тасымалдау қажет. Бір контейнерде бірге тұрып үйренген, шамамен бірдей көлемдегі екі хайуанатты ғана тасымалдауға болады, әрі әр хайуанаттың салмағы 14 кг-дан аспауы тиіс. Салмағы 14 кг-дан асатын хайуанаттар жеке контейнерлерде тасымалданады. Бір контейнерде алты айлықтан аспайтын ұялас үш хайуанатты ғана тасымалдауға рұқсат етіледі.
Хайуанатты (контейнердің салмағын қоса есептегенде) ұшақ кабинасында, сондай-ақ жолжүк бөлімінде тасымалдауға төленетін төлем, сіздің сапарыңыздың бағытына қарай, нормативтен жоғары жолжүктің 1 кг алынатын тариф бойынша екі есе көлемде жасалады. Тарифтер бойынша ақпарат — біздің авиакомпаниямыздың ресми сайтындағы «Нормативтен жоғары жолжүк» бөлімінде. Егер сіздерде сұрақ туындаса, онда special. services@airastana.com жазу арқылы байланысыңыздар.
ЕРЕСЕКТЕР АЛЫП ЖҮРМЕЙТІН БАЛАЛАР
«Эйр Астана» компаниясы ересектер алып жүрмейтін 6-дан 15 жасқа дейінгі кәмелетке толмаған балаларды өз ұшақтарының бортында құшақ жая қарсы алады.
Ересектер ертіп жүрмейтін кәмелетке толмаған балаларға көрсететін қызметі үшін «Эйр Астана» әуе компаниясы қосымша алымдар алмайды.
Қазақстан аумағындағы ішкі рейстерде ересек адам ертіп жүрмейтін, 6-14 жастағы кәмелетке толмаған балалар үшін билеттің бағасы ересектерге белгіленген қолданыстағы толық тарифтің 50%-ын құрайды. Кәмелетке толмаған, ересектер ертіп жүрмейтін 15 жасқа
толған балалар ересектерге белгіленген толық тарифтік мөлшерлемені төлейді.
Халықаралық рейстерде ересектер ертіп жүрмейтін 6-11 жастағы кәмелетке толмаған бала үшін билеттің бағасы ересектерге белгіленген қолданыстағы толық тарифтің 75%-ын құрайды. Ересектер ертіп жүрмейтін 12-15 жастағы балалар ересектерге белгіленген тарифтің толық бағасын төлейді.
Жолда аялдама жасайтын, тікелей ұшпайтын рейстерде, ересек адамдардың ертуінсіз саяхаттауға рұқсат етілмейді.
Билетті брондау кезінде кәмелетке толмаған баланың ата-анасы немесе қамқоршысы арнайы бланкті толтыруы және оған қол қоюы тиіс. Өтініште ұшу орнына дейін алып баратын ересек адам, сондай-ақ балаға жауап беретін және әуежайдан күтіп алатын ересек адам туралы ақпарат көрсетіледі.
6 жастан кіші балаларға тек ересектер ертіп жүргенде ғана саяхаттауға рұқсат етіледі.
Қосымша қауіпсіздікті қамтамасыз ету мақсатымен ересектер ертіп жүрмейтін балалар «Эйр Астана» АҚ барлық ішкі және халықаралық рейстеріне тасымалдауға қабылданбайды, егер рейстің ұшатын уақыты — 23-тен таңертеңгі 6 сағатқа дейін болса (ұшатын орынның уақыты бойынша), тіпті баламалы рейстер болмаса да. Ұшып келетін мезгіл кез келген уақыт болуы мүмкін.
Ересек адамдар ертіп жүрмейтін кәмелетке толмаған балалар үшін билетті, ұшақтың кесте бойынша ұшуынан ең кемі 24 сағат бұрын брондау қажет. Ол үшін бізбен special. services@airastana.com адресі бойынша байланысу немесе саяхат бюросындағы біздің агентімізге қажетті ақпаратты хабарлау керек.
БАЛАЛАР АВТОКРЕСЛОСЫН ТАСЫМАЛДАУ
Балаға жеке орын беру арқылы авиабилет толтырылады және тарифте қарастырылған төлем алынады. Креслоның ені 41 см-ден аспауы тиіс. Кресло сертификатталуы тиіс, ол арнайы белгімен немесе лейблмен расталады, және жолаушы отырғышына тіркеу үшін бекіткіштермен жабдықталуы керек.
Тасымалдау үшін алдын ала сұраныс талап етіледі, оны ұшудан 24 сағат бұрын special.services@airastana.com адресіне жіберу керек.
БАЛА БЕСІГІ
Емшектегі балалармен саяхаттайтын жолаушылар (1 жасқа толмаған), балалар креслосын пайдалана алады.
Boeing-757 және кейбір Airbus А321 сияқты ұшақтар пішіндерінің балалар кереуетін пайдалануға мүмкіндік бермейтінін білу керек. Сізге қажет рейсте балалар кереуетінің бар екені туралы ақпаратты саяхатты жоспарлаудың алдында алдын ала тексеру ұсынылады. Балалар кереуетін резервтеу үшін ол туралы өзіңіздің саяхат бюроңызға хабарлаңыз немесе special.services@ airastana.com-ға жазу арқылы бізбен байланысыңыз.
ЖҮКТІ ӘЙЕЛДЕР
Жүктілігі 22 аптаға дейінгі әйелдер ұшуға берілетін рұқсатпен медициналық анықтамасыз тасымалданады.
Жүктілігі 22 аптадан 34 аптаға дейінгі бір ұрықты жүктілік кезіндегі әйелдер және көп ұрықты жүктілік кезіндегі 22 аптадан 32 аптаға дейінгі жүкті әйелдер жүктіліктің мерзімі туралы медициналық анықтамасы болған жағдайда және денсаулығы қанағаттанарлық болғанда ғана тасымалданады.
Бір ұрықты жүктілік кезіндегі жүктілік мерзімі 34 аптадан асқан және көп ұрықты жүктілік кезіндегі жүктілік мерзімі 32 аптадан асқан әйелдер құзырлы дәрігерлік комиссияның жазбаша түрдегі қорытындысы болғанда тасымалданады. Қр-да № 035-1/у нысаны бойынша тасымал жасалады.
Шетелдік әуежайлардан ұшатын кезде қорытындыны ұшатын елде пайдаланылатын шет тіліне аудару қажет. Қорытындының немесе анықтаманың жарамды мерзімі — 30 күн. Егер ұйғарылатын босану күні таяу 7 күнде күтілетін болса, онда тіпті медициналық қорытынды болған жағдайда да авиакомпания жүкті әйелдерді тасымалдауға қабылдамайды.
Босанған әйелдер мен жаңа туған нәрестелер бала туғаннан кейінгі алғашқы 7 күннің ішінде тасымалдауға жіберілмейді.
«Эйр Астана» АҚ, егер ол межелі елдің иммиграциялық заңнамасының талаптарымен регламенттелсе, онда жүкті әйелді тасымалдаудан бас тартуға құқылы.
КӨРУ ЖӘНЕ ЕСТУ МҮШЕЛЕРІ ЗАҚЫМДАНҒАН ЖОЛАУШЫЛАРҒА КӨРСЕТІЛЕТІН КӨМЕК
Көздері көрмейтін жолаушылардың жетектеуші итпен қосымша төлем жасаусыз саяхат жасауларына болады, әрі хайуанат олардың жолжүгінің бір бөлігі ретінде қаралмайды. Үйретілген жетектеуші итті иесінің аяқтарының жанында ұстап, салонда тасымалдауға болады, бірақ иттің тұмсығына тұмылдырық кигізу керек. Жолаушының итке берілген нақты ветеринарлық құжаттары мен анықтамасы және сертификаты болуы тиіс. Тек Лондонға ұшатын рейстерде жетектеуші иттер тасымалдауға жолжүк бөлімшесінде ғана қабылданады.
Есту мүшелеріне зақым келген жолаушыларға тіркеу рәсімі кезінде біздің қызметкерлеріміздің тарапынан қолдау мен көмек көрсетіледі.
Өзіңіздің турагентіңізге немесе бізге speciаl.services@аirаstаnа.cоm адресіне жазу арқылы осы қызметтің қажеттілігі туралы хабарлауыңызды өтінеміз
ҚОЗҒАЛУ МҮМКІНДІКТЕРІ ШЕКТЕУЛІ ЖОЛАУШЫЛАРҒА АРНАЛҒАН ЖАБДЫҚ
Егер сіз ұшақтың бортына шығуға және одан түсуге қиналатын болсаңыз, біз сізге көмек көрсетуге бейілміз, сізді тіркеу бағанынан жеткенге дейін жетекке аламыз.
«Эйр Астана» 3 түрдегі кресло-арба ұсынады: трапқа дейін, салонға дейін және салондағы орынға дейін.
Егер сіздің мүгедектерге арналған креслоңыз болса, онда ол тіркелген жолжүк ретінде тегін тасымалданады.
Жеке кресло-арбаңызды тасымалдау жөнінде қосымша ақпарат алу және көрсетілетін қызметтерге тапсырыс беру үшін сіздер ұшудан кемі 24 сағат бұрын special.services@ airastana.com-ға хабарласа аласыздар.
Зембілмен тасымалданатын жолаушылыр
• Тек зембілмен ғана тасымалданатын жолаушылар тасымалдауға қабылданады.
• Сұраныс авиакомпанияға ұшудан 72 сағат бұрын жіберілуі тиіс.
• Жолаушының қасында міндетті түрде ертіп жүретін адамы болуы тиіс.
• Біз өз жолаушыларымызға қолдан келетін көмектің бәрін көрсетуіміз үшін бізге ұшудан ең кемі 36 сағат бұрын сіздердің қажеттіліктеріңіз туралы ақпарат керек (72 сағат – зембілмен тасылатын жолаушылар үшін). Егер сіздерге арнайы көмек керек болса, онда бізбен хабарласып, speciаl.services@аirаstаnа.cоm адресіне сұраныс жіберулеріңізді өтінеміз.
МУЗЫКАЛЫҚ АСПАПТАР МЕН МОРТ СЫНҒЫШ ЗАТТАРДЫ ТАСЫМАЛДАУ
Егер виолончель немесе контрабас сияқты музыкалық аспабыңызды алып жүруді жоспарлап отырсаңыз, салонда қосымша орын ақысын төлеуіңіз қажет. Агентіңіз немесе «Эйр Астана» әуе компаниясының жергілікті кеңсесі аспабыңызға билет алуға көмектеседі. Аспап салмағы 75 кг-нан, ал мөлшері 120 x 50 x 30 см-ден аспауы тиіс.
Гитаралар, саксофондар, тағы да басқа шағын музыкалық аспаптарды қол жүгі ретінде тіркеуге болады.
Салмағы 75 кг-нан аспайтын және мөлшері 120 x 50 x 30 см-ден аспайтын осал заттарды тасымалдаған кезде де қосымша билет сатып алу қажет.
Жолаушылар салонында музыкалық аспаптарды тасымалдау туралы қосымша ақпаратты алу үшін және сұранымдарыңызды жіберу үшін special.services@airastana.com бөліміне хабарласыңыз.
Жолаушылар салонында телевизорларды, тағы да басқа тұрмыстық техника жабдықтарын тасымалдауға тыйым салынады. «Эйр Астана» әуе компаниясының жүкті тасымалдаумен айналысатын коммерциялық бөліміне cargo@ airastana.com электронды мекен-жайы арқылы хабарласуыңызды сұраймыз.
СПОРТТЫҚ ҚҰРАЛ-ЖАБДЫҚТЫ ТАСЫМАЛДАУ
Егер сіздер өздеріңізбен бірге саяхатқа спорттық құрал-жабдық алатын болсаңыздар, онда өздеріңіздің турагентіңізден немесе бізден ықтимал қосымша алымдар мен тасымалдау шарттары туралы консультация алыңыздар, ол үшін special.services@airastana.com адресіне жазыңыздар
Шаңғы/сноуборд. Естеріңізде болсын, шаңғы мен сноубордты тіркеуден өткізу қажет емес. Жабдықтың осы түрін мұқият орау керек және ол жүк бөлігінде тіркелген жолжүк есебінде тасымалданады.
Егер жабдықтың жалпы салмағы эконом-класта рұқсат етілетін 20 кг-дан немесе бизнес-кластағы 30 кг –дан асып кетсе, онда нормадан тыс жолжүктің тарифі бойынша қосымша төлем алынады (маршрутына қарай).
Жолжүктің бір орны мыналарды қамтиды: бір жұп шаңғы, бір жұп шаңғы таяқтары, бір жұп шаңғы бәтіңкесі.
Осы ережелер сондай-ақ тенниске, балық аулауға, атқа салт мініп жүруге (бәтіңке, ер-тоқым), бадминтонға арналған жабдықты тасымалдауға да қолданылады.
Велосипед. Велосипедті тасымалдау үшін қосымша брондау қажет. Бір жолаушы тек 1 велосипедті ғана тасымалдай алады. Ұшудың алдында велосипедті мұқият орау, мүмкіндігіне қарай бүктеу және педальдарын алу керек. Велосипедті тасымалдау үшін төлем тіркеуде жасалады – 7000 теңге (ішкі рейстерде) немесе 50 Euro/15 мың теңге (халықаралық рейстерде).
Гольф ойынына арналған құрал-жабдық алдын ала брондауды қажет етпейді. Оны мұқият орап, тіркеуде жолжүк бөлігіне өткізу керек.
Гольф ойынына арналған құралжабдықты тасымалдау үшін төлем тіркеуде жасалады – 5000 теңге (ішкі рейстерде) немесе 25 Euro/9 мың теңге (халықаралық рейстерде). Құралжабдық жинақтамасына кіретіндер: гольф ойынына арналған ең көп болғанда 14 доптаяқ, олар арнайы сөмкеге салынады; ең көп дегенде 12 доп; бәтіңке пары; доптіреуіштер.
Спорт қаруы. Егер сіздер спорт қаруын тасымалдауды жоспарласаңыздар, онда авиакомпанияның алдын ала рұқсаты қажет. Ақпарат пен рұқсат алу үшін мына адреске хабарласыңыздар: special.services@airastana.com.
ТЕК ТАИЛАНД! BKK-ГЕ сұраныс жасаған кезде сондай-ақ лицензия, паспорттың көшірмесін, National Shooting Sport Association of Thailand-тың рұқсатын сұрату керек.
Литий батареяларымен іске қосылатын hover-board (гироскутер), mini-segway (мотокат, сегвей, самокат), air-wheel (бір доңғалақты гироскутер), solo-wheel (монодоңғалақ), balancewheel (электрлік ықшам моноцикл) сияқты дербес моторландырылған шағын қозғалыс құралдарын және жоғарыда аталғандарға ұқсас басқа да құрылғыларды жолаушыларға барлық жолжүк түрлерінде тасымалдауға үзілді-кесілді тыйым салынады.
РАДИОЭЛЕКТРОНИКАНЫ ТАСЫМАЛДАУ
Егер олардың көлемдері мен салмағы қол жүгінің габариттерінен аспайтын болса, сіздер аса сақтық шараларын талап ететін заттарды салонға алуларыңызға болады. Ұшу кезінде қауіпсіздікті қамтамасыз ету үшін электронды құрылғыларды пайдаланбауларыңызды өтінеміз (ұялы телефондар, компьютерлер және т.с.с.), олар ұшақтың көтерілуі мен төмендеуі кезінде радионавигациялық жабдық пен аппаратураның жұмысына кедергі келтіруі мүмкін.