Кераланың су қойнаулары
Туристерді Кералаға сөзсіз тартатындар — әдемі өзендері, каналдары мен су қойнаулары. Штат аумағында мұхитқа құятын 40 шақты өзен бар. Олар ирек-ирек және жағалауды бойлай көп километрлерге созылып жатқан өзендермен, тармақтармен және каналдармен өзара қосылатын ішкі көлдердің, лагуналардың, шығанақтар мен су қойнауларының шытырман жүйесін құрайды. Осы көркем лабиринттермен жүзу мүмкіндігін қалт жіберіп алмаңыздар.
Каналдардың жағаларында адамдар тұрады, олар осы өңірде дәстүрлі түрде өсіріліп келген дәмдеуіштерді, шай мен жемістерді, басқа да өнімдерді түкпірдегі шалғай мекеннен портқа жіңішке қайықтармен жеткізу үшін каналдарды ғасырлар бойы пайдаланып отырған.
Үнділік Венецияға саяхаттауға судағы нағыз отель түрінде қайта жасалған дәстүрлі қайық — хаусботпен барған жөн, онда жайлы демалуға керектінің бәрі де: кондиционер орнатылған, дәретханасы мен душы бар екі бөлме және сөзсіз бас аспазы болатын қызметшілер командасы бар. Осы ертегідей ғажайып жерлердің сұлулығы мен бүлінбеген төл табиғатынан барынша ләззат алу үшін хаусботты екі күнге жалдаңыздар.
Қайық бортында сіздерге әдетте банан жапырағына салып беретін кералалық дәстүрлі тамақтар — балық, теңіз өнімдері, кокос, тропикалық жемістер, көкөністер, ірі бұршақтар және, әрине, күріш ұсынылады. Карри, кинза, жалбыз, кардамон, қалампыр, даршын, чили және зімбір сияқты шөптер мен дәмдеуіштердің түр-түрі жергілікті жеңсік астардың хош иістеріне қайталанбайтын дәмдер қосады.