Құрметті «Эйр Астана» жолаушысы!
Мен сіздерге және отбасыларыңызға бақытты Жаңа жыл және мерекелік көңіл-күй тілегім келеді. Көбіңіз қазірдің өзінде қыстың қытымыр суығынан қашып, тропикалық аймақтарға бет алдыңыздар немесе осыны ойластырудасыздар. Бәлкім, біреулеріңіз осы нөмірдің мұқабасында ұсынылған Таиландтың ең керемет аралдарының бірі – Ко Чанг аралына немесе айрықша әсер қалдыратын орталық Вьетнам жағалауына, не болмаса
«Эйр Астана» рейстері тұрақты қатынайтын Бангкок, Хошимин және Дели арқылы жетуге болатын, жанды жайландыратын Кералаға барарсыздар. Алайда менің өзім сияқты, тұп-тұнық қысқы көгілдір аспан, аяқ астында сықыр-сықыр ететін жаңа жауған аппақ қар және шаңғы көңіліне шаттық сыйлайтын адамдарға Алматының спорттық курорты — Шымбұлақтағы қысқы маусымды өткізіп алмауға кеңес беремін. Жергілікті тұрғындар мұны жақсы білетіндіктен, бұл кеңесім негізінен шетелдік жолаушыларға арналған. 2011 жылы Шымбұлақта – Қысқы Азия ойындары, ал өткен жылы – Универсиада болып өтті, осы шаралардан кейін мұнда барлық деңгейлердегі шаңғышылар мен сноубордшылар үшін тамаша көтергіштер мен трассалар, ағылшын тілінде сөйлейтін нұсқаушылар, уақытша пайдалануға берілетін жоғары сапалы жарақтар, балаларға арналған клубтар мен ойын алаңдары, сондай-ақ бағасы қолжетімді ресторандар мен барлардың мол таңдауы пайда болды. Егер сіздерге шаңғы ұнамаса, жай ғана жергілікті аспалы арқан жолмен серуендеуіңізге болады, мұндағы аспалы жол әлемдегі ең ұзын жолдардың бірі болып табылады. Осы қызықты саяхат барысында сіздер Тянь-шань тауларын көре аласыздар. Памир мен Қарақорым арқылы өтіп, алып Гималайға барып тірелетін Азия тау жүйелері нақ осы жерден бастау алады.
ЭКСПО жылы болуымен атаулы 2017 жылы мен осы бағанада Астананы жиі еске алдым, өйткені Қазақстанның елордасы Азиядағы жаңа қалалардың ішінде ең инновациялық, әсерлі және үйлесімді қала болып табылады. Бірақ Алматыда да қызықты жерлер көп. Қолайлы климаты мен орналасқан жері оны әрқашан тартымды еткен, мұнда туризм мен мәдениет белсенді дамиды. Алайда соңғы кездегі жаңа енгізілімдер – көше базарлары, жаяу жүргіншілер аймақтары, метро, қарқынды даму үстіндегі ресторандар, барлар, музыкалық клубтар, мейманханалар және сауда орталықтары желісі Алматы әкімінің қаламыз «Орталық Азиядағы Гонконг» атауына әбден сай келеді деген сөздерін айғақтай түседі. Осы қалалардың әрқайсысында біраз жыл өмір сүрген мен мұның шынымен де осылай екендігін сенімді түрде растай аламын.
Ұшу сапарларыңыз оң болсын!
Ізгі ниетпен,
Питер Фостер,
«Эйр Астана» әуе компаниясының президенті