Құрметті «Эйр Астана» жолаушысы!
Өзінің осыдан 70 жыл бұрын жарияланған «Жол жоқ» атты авиациялық роман-триллерінің алғысөзінде британдық автор Невил Шют: «Жазатайым жағдайлар мен оқыс оқиғаларды егжей-тегжейлі, мұқият зерделеу әуедегі қауіпсіздіктің кілті болып табылады және ең жоғары дәрежелі кәсіби мамандарды қажет етеді», - деп жазды. Тәжірибелі азаматтық және әскери әуе инженері болған Шют өзінің не туралы айтып отырғанын білді. Бүгінде орындалып жүрген коммерциялық ұшулар 1948 жылғы ұшулардан әлдеқайда қауіпсіз, дегенмен, тәуекелдер әлі де бар. Әуе кемелері толықтай дерлік автоматтандырылған жүйелермен жабдықталып, көптеген мүмкіндіктерге, резервтерге және қосарлы функцияларға ие болып отырған қазіргі уақытта тәуекелдің барынша азайтылуы мүмкін және азайтылуы тиіс болғанымен, оның ешқашан толығымен жойыла алмайтындығы назардан тыс қалып қоюы мүмкін. Нашар ауа райы, күрделі ауа ағыны, ұшақ ақаулары, адами және басқа да факторлар оқыс оқиғаларға себеп болуы мүмкін екендігі сөзсіз, сондықтан тергеу органдарының жұмысы әуе кемелері өндірілетін елдегі сарапшылардың және (қажет болса) кеме тіркелген елдегі сарапшылардың пікірімен нығайтылып, сенімді және барынша шынайы болғаны аса маңызды. ICAO халықаралық азаматтық авиация ұйымы – азаматтық авиациясы тиісті деңгейде дамыған барлық елдердің қосылуы тиіс «супер-реттеуші».
Оның міндетті ережелері тергеулерді жүргізу тәртібі туралы нақты нұсқаулар береді. Біз өзіміз жұмыс істейтін барлық елдерді ұшу қауіпсіздігін тұрақты түрде арттыру мақсатында ICAO нормаларын қатаң сақтауға шақырамыз.
Жаз басталысымен сіздердің көбіңіз отбасыларыңызбен саяхаттап, шет елдерге шығасыздар немесе Қазақстанға келесіздер.
Біз танымал демалыс орындарына рейстердің жиілігін ұлғайтуымызды жалғастырамыз және осы мақсатта жақында А321 нұсқасынан ірірек, үшінші Airbus NEO әуе кемесін алдық. Ал мен сіздердің жазғы демалыстарыңызды жақсы өткізулеріңізге тілектеспін!
Құрметпен,
Питер Фостер,
«Эйр Астана» әуе компаниясының президенті