Тбилиси қалай құрылған
Таулардың қойнауында амфитеатр болып орналасқан Тбилиси көрінісі қаланың стильдік ерекшелігін құрайды және архитектуралық ерекшелігіне ықпал етеді: орманды таулары, сарқырама су аққан қатпарлы жартастары күтпеген жерлерден кездеседі, қала келбетінің болжауға келмейтін күрделілігі соншалық, кейде тіпті тым шытырман болып көрінеді. Қаланың архитектуралық даралығы оның орталығында неғұрлым толық көрініс табады. Тік беткейлі өзен жағалауындағы ағаштан жасалған аспалы нәзік балкондар қорқыныштан тізеңді қалтыратып, сонымен бір мезгілде шаттыққа бөлеп, тәнті етеді: тұрғындардың осындай экзотикалық, бірақ сондай оралымсыз баспаналардан табан аудармаулары таң қалдырады! Мұндағы көшелер жоғарытөмен қайшалысып, өздеріне-өздері оралып, тәжірибесіз саяхатшыны жолдан жаңылдырады және осындай топографиялық торығу кезінде ғажайып сыйлықтарын сыйлайды. Кура өзені қаланы тең көлемді екі бөлікке — оң және сол жағалауға бөледі, оларды бірнеше көпір жалғастырып жатыр, солардың ең атақтылары — Тамара патшайым көпірі (бір кездері Челюскиндіктер көпірі болған), ұлы ақын Галактион Табидзенің құрметіне аталған Галактион көпірі, ғашық жұптардың адам бойымен бірдей етіп жасалған мүсіндері орнатылған Бараташвили көпірі, Метехи бекінісі мен қаланың негізін қалаушы Вахтанг Горгасалдың атқа мінген мүсінін қамтитын қала ансамблінде фотографтардың сүйікті орнына айналған Метехи көпірі. Дәстүрлі түрде оң жағалау беделдірек, сол жағалау демократияшыл болып есептеледі. Негізінен туристер көптеп жүретін Тбилисидің тарихи орталығын біраз аралап көрелік.