Құрғақ көпір

Тіпті қалаға бір-екі күнге келсеңіздер де, бір-екі сағат уақыттарыңызды жүректен жұлып, ерінбей, бұрынғы Михайлов көпірі, қазіргі Құрғақ көпірге барыңыздар. 1849 жылы авторы және бас құрылысшысы Джованни Студиери бастаған көпірді 1851 жылы инженер Бликс аяқтады. ХХ ғасырдың 30-шы жылдарына дейін оның астында алдымен Орбелиани князьдарына, содан соң кәсіпкер Мадатовқа тиесілі болған аралды бөліп жатқан Кура тармақтарының бірі ағып жатты. Тармақ кеуіп қалды, арал жоғалды, ал көпір сол күйі қалып, Құрғақ көпір жаңа атауына ие болды. Оны оң жағалаудағы құрылыстан — атап айтқанда, көпірдің басында бір-біріне қарама-қарсы қарап тұрған, классицизм үлгілері ретінде қызығушылық тудыратын бұрынғы «Лондон» және «Гранд-отель» қонақүйлерінен ажыратуға келмейді. Бірнеше жыл бұрын Тбилисидің атақты жайма базарын жою немесе басқа бір жерге ауыстыру қажет болды. Осы кезде не басталды десеңізші! Бұл — үнемі өмір қайнап жататын, богемалық ізденіс рухы үстемдік құрған, айрықшалықты, бірегейлікті көксеген, қолдан жасалған сөрелерінде көркемдігі жоғары заттар мен ешқашан жойылмайтын себеттер қатар түзетін қаланың көрнекті орны. Жайма базарды қорғап қалудың сәті түсті — оны әрірек жерге көшіруге болады деген уәж қабылданбады: өйткені бүкіл өркениетті әлемде мұндай базарлар туристерге қолжетімді жерде болып, елді тағы бір қырынан көрулеріне мүмкіндік берулері тиіс. Сервиздер, күміс тұтқалы хрусталь құмыралар, қола мүсіндер, Солтүстік Кавказдағы, кейде тіпті жергілікті шеберлердің жасаған әсем әшекейлері — барлық осы артефактілердің ішінен жүрегіңді селт еткізер өз затыңды табудан дәмеленудің тәтті сезімі сондай рахат!