Дельтапландар туралы
Өзімнің алғашқы дельтапланымды өз қолыммен жасағанымды мақтан тұтамын. Ол кезде дайын үлгілерді сатып алу қиын болатын, бірақ мен әлемді ұшар биіктен көруді армандағаным соншалық, бір жыл бойы ас үйде газеттердегі фотосуреттерге қарап отырып, өз сызбаларым бойынша оның конструкциясын жинақтадым. Ақыры онымен ұшудың да сәті түсті! Алдымен әуе шарын жасағым келген, бірақ оған қаражатым жетпеді. Дельтапланның өзіне бөлшектерін әзер жинадым. Әйелім екеуміз дюралюминий құбырларды алып келу үшін ғарыш станциясына бірнеше километр жаяу жүріп барғандығымыз есімде. Қыстыгүні, биік тау басына. Жалғыз автобусқа кешігіп қалып, кері қарай да жаяу келгенбіз. Әйелім екеуміз бірге альпинизммен, құзға шығумен айналысатынбыз. Екеуміз де тау туризмі бойынша нұсқаушы болдық: ол базада балалармен жұмыс істесе, мен маршруттарды алып жүретінмін. Бір жазда үш рет, кейде тіпті бес рет туристерді Ыстықкөлге жаяу ертіп апарып, алып келетінбіз. Мен шытырман оқиғаларға әрқашан әуес болдым. Өзбекстанға дельтапланеризмнен жарысқа барғанымда, менен төреші болуымды өтінді. Ал мен болсам, ол кезде әлі бірде-бір рет ұшып та көрген емес едім! Бірақ мен бұл тақырыптың қыр-сырын әбден меңгеріп, аппаратты қалай жасап, онымен қалай ұшуға болатынын зерделеген едім. Әрине, бәрі менен кеңес сұрайтын. Алғаш рет 36 жасымда ұштым. Үш жылдай ұштым, бірақ кейіннен анам жалбарынып, бұдан былай ұшпауымды өтінді.