Үнсіздік — алтын
Йоганың мәні жаттығулар кешенін орындауда ғана емес, оның рухани құрауышы — медитация. Батыста медитация Үндістанның солтүстігінде, Гималай тауының бөктерінде, Ганг өзенінің жағасында орналасқан Ришикеш қаласына «Битлз» тобы келгеннен кейін, 1960-шы жылдары танымалдыққа ие бола бастады. Музыканттар онда рухани медитация өнеріне үйрену үшін барды. Ришикеш әлі күнге дейін медитацияға оқытып-үйрететін басты орталық болып қалып отыр. Мұнда медитацияның негізгі екі түріне: випрассана мен саматаға маманданатын бірнеше ашрам мен мектеп бар. Випассананың идеясы — қазіргі сәтте өмір сүру, нақтылықты және айналада болып жатқан жайларды ұғыну. Саматаның философиясы — абсолютті тыныштық күйі және барлық қалғандарына көңіл бөлмей, тек бір нәрсеге зейін қою. Ришикештегі Vedansha ведалық ғылымдар институты тұру мен тамақтануды қамтитын випрассана медитациясының сегіз күндік курсын ұсынады. Сондай-ақ Гималайда Tushita медитация орталығы бар, бұл — сергітетін тау ауасымен дем алып, медитация жасау үшін мінсіз орын. Tushita ықылас білдірушілердің барлығына Karma Yoga орталығында екі күндік кіріспе курстарды ұсынады; сіздер тек жинап-тазалауға көмектессеңіздер болды.
Үнсіздік орталықтары деп аталатын жерлерде толығымен сандық әлемнен тазару да танымалдыққа ие болып келеді. Бұндай жерлерде толық тыныштық сақталады, мұнда бүкіл курс бойында қандай да бір девайстарды пайдалануға тыйым салынған. Осындай орталықтардың бірі — Shreyas орталығы Үндістанның оңтүстігіндегі Бангалор қаласына жақын маңдағы тыныш оазис-бақта орналасқан. Ол үнсіздік медитациясының жеті күндік курсын ұсынады, оның мәні — өзін-өзі талдау мен ақыл-ойды тазартуда.