Қалия, әнші
Лондон — менің жүрегімді жаулаған қала. Сапарға шығар алдында міндетті түрде алдағы уақытта болатын көрмелер мен концерттер туралы ақпарат іздестіріңіздер, сіздердің жолдарыңыз болып, қандай да бір керемет көрмеге тап болуларыңыз немесе сүйікті әртістеріңіздің концертін көрулеріңіз мүмкін. Билеттерді алдын ала, онлайн брондап қойыңыздар.
Тамақ жағына келетін болсақ, бұл қалада кез келген талғамға және бюджетке тамақ табуға болады. Пікірлерді оқып, туристік орындарға бармауға тырысыңыздар. Міндетті түрде La Duree дүкенінен макарун тәттісінің дәмін татып көріңіздер, менің сүйікті макарундарым — ванильді және карамельді.
Метромен немесе убер-таксимен жүріңіздер. Метро үшін oyster card болғаны ыңғайлы, оның теңгерімін терминалдарда толтыруға немесе смартфонға қолданба жүктеп алып, интернет болса, онлайн төлем жасауға болады. Интернетке қолжетімділік болуы үшін жергілікті сим-картаны сатып алыңыздар немесе роутер жалға алыңыздар, өйткені сіздерге интернет үнемі қажет болады, ал wi-fi барлық жерде бола бермейді. Көбірек саяхаттап, әлемді тани түсіңіздер!