Дубай мәзірі
Баә-нің қарқынды дамуына көз ілеспейді, бұл ел жаңа жобаларымен, архитектуралық құрылыстарымен және ойын-сауық орындарымен таң қалдыруын тоқтатпайды. Француз сәулетшісі Жан Нувельдің жобасы бойынша 2017 жылы Әбу-дабиде ашылған Лувр филиалының өзі неге тұрады.
Дубай — Парсы шығанағының жағалауындағы ең белгілі әмірлік және мегаполис. Таяу Шығыс аумағында оны Араб Шығанағы деп атайтындығын, оның атауында «Парсы» сөзін қолдануға тыйым салынғандығын айта кеткен жөн.
Дубай — шын мәнінде көп мәдениетті қала, 2017 жылы онда 15,5 миллионнан астам турист болып қайтты, бұл алдыңғы жылмен салыстырғанда 6,2%-ға көбірек. Туристердің көбі Үндістаннан, Ұлыбританиядан, Қытайдан, Ресейден, Ақш-тан және Таяу
Шығыс елдерінен келеді. 2018 жылғы деректер бойынша, әмірлікте 3 миллионнан астам адам тұрады, солардың 85%-ын иммигранттар құрайды. Негізінен бұлар — Филиппиннен, Үндістаннан, Пәкістаннан, Бангладештен, Африкадан және ТМД елдерінен келгендер.
Көп ұлтты халық Дубайдың аспаздық ерекшеліктеріне елеулі әсер етіп, оны нағыз тағам талғампаздарына арналған қалаға айналдырды. Мұнда әлемнің барлық дерлік тағамдары ұсынылады, сондықтан әркім өзінің талғамы мен әмиянына қарай: Карама ауданында 5 долларға үнді бирианиінен бастап 400 долларға 7 жұлдызды қонақ үйдегі кешкі асқа дейін қалағанын табады. Алкогольді сусындар әмірліктерде тек лицензияланған ресторандарда ғана болады, ал олар көбінесе қонақ үйлерде орналасқан. Сауда орталықтары мен көше дәмханаларында алкоголь сатуға қатаң тыйым салынған.
Fine-dining деп аталатын жоғары дәрежелі ресторандар негізінен 5 жұлдызды қонақ үйлерде, сондай-ақ қаланың қаржылық орталығы — DIFC (Dubai International Financial Centre) ауданында орналасады. Ет тағамдарын жақсы көретіндер үшін бұл ауданда Gaucho аргентиналық стейктер рестораны, сондай-ақ түпнұсқалық рецептер бойынша дайындалған чурасконың дәмін татып көруге болатын Fogo de Chão бразилиялық стейкхаусы ашылған. Ең танымал стейкхаус, әрине, Түркиядан келген ет
патшасы және интернет сенсациясы Нусрет Гөкченің рестораны — Nusr-et Steahouse Dubai болып табылады. Бұл мекемелердегі орташа чек адам басына шаққанда
100-150 долларды құрайды.
Дубайдағы ең салтанатты ресторандардың бірі британдық бас аспаз Натан Аутлоның басқаруындағы Al Mahara рестораны болып табылады. Ресторан 7 жұлдызды Burj Al Arab қонақ үйінде орналасқан және ең балғын теңіз өнімдерінен жасалған тағамдарға маманданады. Қабырғалардың орнына мұнда экзотикалық балықтары бар үлкен аквариум қойылған, бұл — романтикалық кездесу үшін тамаша орын. Екі адамға арналған таңдаулы кешкі ас шамамен 350-400 долларға айналады.
Егер сіздер теңіз өнімдерін жақсы көретін болсаңыздар және отбасылық бюджеттеріңізді сақтағыларыңыз келсе,
Mall of the Emirates сауда орталығына жақын маңдағы Әл Барша ауданында орналасқан
Ibn Hamido балық ресторанына баруға кеңес береміз. Ол бір кездері Тмд-дан келген туристер арасында танымал болған, ал қазір позициясын едәуір жоғалтқан Golden Fork кафесін лайықты алмастырады. Теңіз өнімдерінен жасалған сорпа мен жаңа ауланған балықтан жасалған тағам шамамен 30 доллар тұрады.
Қымбат ресторандардан басқа, Дубайда қолжетімді мекемелер де өте көп. Солардың ең арзандары — сауда орталықтарындағы фуд-корттарда. Олардан үнді, ливан, қытай тағамдары ұсынылатын дәмхананы және, әрине, әр түрлі фаст-фуд тағамдарын табуға болады.
Егер жүрдім-бардым тамақтануды ұнатпайтын болсаңыздар, әрбір сауда орталығында толыққанды дәмханалар мен ресторандар бар. Туристер ең көп баратын Dubai Mall және Mall of the Emirates сауда
орталықтарында американдық желідегі The Cheesecake Factory ресторандары орналасқан. Мұндағы порциялардың үлкендігі соншалық, екі немесе тіпті үш адамға бір порция тапсырыс бере беруге болады. Күндізгі уақытта мекеме lunch-size portions ұсынады, олар стандартты порциялардан сәл кішірек және арзанырақ. Мұнда шынымен де дәмді, әрі сондай жайлы, ал тегін берілетін жылы наны тіпті керемет. 40-тан астам түрі ұсынылатын чизкейктерге де орын қалдыруды ұмытпаңыздар. Екі адамға арналған тойымды түскі ас орташа есеппен алғанда 60 доллар болады.
Dubai Mall сауда орталығына жақын маңда шағын ғана Souk Al Bahar сауда орталығы орналасқан, араб тілінен аударғанда ол «теңізші базары» дегенді білдіреді. Орталық араб сарайы түрінде салынған, оның аумағында жүзден астам дүкен мен жиырма ресторан орналасқан. Соның ішіндегі ең танымалдарының бірі араб тағамдарының
Abd El Wahab рестораны болып табылады, онда дәстүрлі ливан тағамдары ұсынылады. Мұнда араб тіскебасарларының (мезе) таңдауы мол, әсіресе анар соусы қосылған тауық бауырын, сондай-ақ грильде қақтап пісірілген тағамдарды атап өткен жөн. Террасадан бүгінгі таңда әлемдегі ең ірі субұрқақтардың бірі болып табылатын Дубай субұрқақтарына тамаша көрініс ашылады: олардың ұзындығы 275 метр болса, су ағынының биіктігі 150 метрге жетеді. Екі адамға шаққандағы орташа чек — 80 долларға жуық.
Дубайға келіп тұрып, үнді тағамдарынан дәм татпауға болмайды. Мұнда үнді ресторандары ерекше көп, соның ішінде салтанаттылары да, олардан гөрі қолжетімдіректері де бар. Мысалы, Karachi Darbar дәмханалар желісіндегі түскі тамақ 10 доллардан аз тұрады. Дәстүрлі пәкістандық тағамдар ұсынылатын Ravi Restaurant жергілікті аңызға айналған. Бирианиден немесе сиыр етінен жасалған қуырдақтан және ыстық, қытырлақ шелпек наннан тұратын түскі ас та сіздер үшін 10 долларға айналады.
Туған елінің тағамдарын сағынғандар үшін Дубайда орыс, қазақ және өзбек тағамдары ұсынылатын дәмхана ашылған. Мысалы, Uzbegim дәмханасында салаттан, сорпадан, ыстық тағамнан және тандыр наннан құралған бизнес-ланч 10-12 доллар тұрады.
Әмірліктің барлық танымал мекемелерін тізімдеп шығу қиын. The Beach, Citywalk, La Mer және Boxpark сияқты аудандарда серуендеуге кеңес береміз, оларда әрбір адам өз талғамына қарай әлдене таңдай алатын ондаған әр түрлі мекемелер ашылған.