Қысқы Қазақстан
Қыс — Қазақстанға келу үшін тамаша уақыт. Жылырақ киініп, қысқы ойын-сауықтармен танысуға — Астананың маңындағы шаңғы тебуге арналған жерлерді зерттеуге, мұз астында балық аулауда бақтарыңызды сынап көруге немесе хоккей матчын көруге аттаныңыздар. Алматыда тау шаңғысымен немесе сноубордпен, конькимен сырғанауға, паркте аттар жегілген шанамен бір айналып шығуға немесе классикалық балетті тамашалау үшін театрға баруға болады.
Астанадағы қыс
Астананың Алматы сияқты қарлы таулармен қоршалып тұрмағандығына қарамастан, елорданың да шаңғышыларға ұсынары бар. Қаланың өзі мен оның төңірегіндегі жергілікті жазық жерлерде шаңғы тебу үшін мүмкіндіктер мол. Бұл ретте тау шаңғысындағы сияқты еңіске сенім артпай, алға жылжу үшін таяқпен итеріліп, өз күштеріңізді пайдалану қажет болады.
Жаңадан бастағандар үшін Астанадағы Орталық парктің қар басқан жолдары өте ыңғайлы. Неғұрлым тәжірибелі спортшылардың елордадан солтүстікке қарай 250 км қашықтықта орналасқан, арнайы осы мақсатта салынған Шортандыдағы шаңғы базасының айналасындағы биатлонға арналған трассаларда шаңғы тебулеріне болады. Сондай-ақ қазақстандық ұлттық шаңғы орталығы базасында шаңғы трамплиндері бар, онда трамплиннен шаңғымен секіру бойынша қазақстандық спортшылар және биатлоншылар жаттығады. Қосымша ақпаратпен www.skisite.kz сайтында танысуға болады.
Мұз астында балық аулау
Қыста қазақстандық су айдындарының көпшілігі қатты мұз қабатымен жабылады, осы кезде оларды аязға төзімді балықшылар тобы жайлайды. Бірнеше қабат сырмалы киім киіп, мұздағы ойықтың жанына үймелей жайғасады да, төмен температураны мүлдем елемейтіндей, балықтың қармақ қабуын сағаттап күтіп отыра береді.
Қармақтан басқа, мұз астында қысқы балық аулаудың басты құралы мұзда ойық оюға арналған мұзбұрғы болып табылады. Сонымен қатар, сіздерге көп жылы киім мен
үлкен шыдамдылық қажет. Басқалар қай жерде балық аулап отырғанын қараңыздар, демек, сол жерде балық көп, сіздер де жақын маңға жайғасыңыздар.
Астанадағы Есіл өзені — мұз астында балық аулау үшін айтарлықтай танымал орын, бірақ неғұрлым жүрек жұтқан балықшылар Теңіз көліне барады, онда көксерке мен табан балық мол. Көл елордадан көлікпен үш сағаттық жердегі Қорғалжын мемлекеттік табиғи қорығында орналасқан.
Мұз үстіндегі хоккей
Астанада мұз үстіндегі хоккей матчына баруға болады. «Барыс» хоккей командасы Солтүстік Америкалық Ұлттық хоккей лигасының, ҰХЛ баламасы — Құрлықтық хоккей лигасында, ҚХЛ-ДА ойнайды. ҚХЛДА Ресей, Қазақстан, Беларусь, Финляндия, Словакия және Қытай командалары ойнайды.
«Барыс» командасы ҚХЛ шығыс лигасында ойнайды, оған Канада, Ресей, Швеция және Қазақстан спортшылары кіреді. 2015 жылы ашылған, 11500 көрермен сыятын «Барыс Арена» заманауи спорт кешені бұл команданың үйіне айналды десе де болады. Ірі спорт шараларымен қатар, мұнда сондайақ басқа да ауқымды шаралар, мысалы, жұлдыздардың концерттері өткізіледі.
Хоккей маусымы қыркүйек айынан ақпан айына дейін созылады, Астанадағы үй матчтары аптасына үш ретке дейін өткізіледі. Кестені hcbarys.kz сайтынан көруге, билеттерді ticketon.kz сайтынан сатып алуға болады.
Оңтүстік астанадағы қыс
Қазақстанның оңтүстік астанасының орталығынан Іле Алатауы тау жотасының шыңдарына жету үшін көлікпен бір сағаттан аз уақыт кетеді, бұл таулар қысқы ойын-сауықтарға өте қолайлы. Бұл жерде белсенді демалысты ұнататындарға қысқы спорт түрлерінің толық топтамасы ұсынылады, өйткені мұнда жаңадан бастағандарға арналған жолдардан бастап тәжірибелі шаңғышылар мен сноубордшыларға арналған тік еңістерге дейін барлық деңгейлердегі шапшаң сырғанап түсу трассалары бар.
Көпшілік арасында сырғанаудан аулақ болуға тырысып, трассаларға таңертең ерте шыққысы келетіндер үшін S.N.E.G Hotel қонақ үйі өте қолайлы. Бұл шағын бутик-қонақ үйге Шымбұлақ тау шаңғысы курортынан аспалы жолмен жетуге болады. Таңертең ерте, табалдырықтан аттай сала, сіздер тау бөктерлерінің көрінісінен ләззат ала аласыздар, олар бірнеше сағат бойы сіздердің толық иеліктеріңізде болады, өйткені тауға көтеретін фуникулер тек таңғы сағат 9:30-да жұмыс істей бастайды. Дәл осы жерде ресторан да бар, одан тау пейзаждарына тамаша көрініс ашылады, қонақ үйде небәрі алты бөлме, сондықтан мұнда тұруды алдын ала брондап қойған жөн.
Алматының атаулы жерлері
Медеу — әлемдегі ең биік таулы мұз айдыны. Теңіз деңгейінен 1691 метр биіктікте орналасқан ол алматылықтардың жыл бойғы сүйікті орны болып табылады. Сондықтан демалыс күндерінде мұнда адам өте көп болады. Жұмыс күні барудың сәті түссе, сіздердің жолдарыңыз болады, мұз айдынында емін-еркін, рахаттанып демала аласыздар.
Күндізгі сырғанау үшін мұз айдыны сағ. 10:00-ден 16:00-ге дейін ашық (сәрсенбі-бейсенбі күндері — сағ. 15:00-ге дейін), кешкі сырғанау — дүйсенбіден басқа күндері, күн сайын сағ. 18:00ден 23:00-ге дейін. Конькиді осы жерден прокатқа алуға болады. Медеу № 12 автобуспен қаладан 30 минуттық жерде орналасқан, автобус «Қазақстан» қонақ үйіне қарама-қарсы аялдамадан жүреді.
Қаладан Алматының биік таулармен қоршалған тағы бір інжуі — Үлкен Алматы көліне бару бір күн уақыттарыңызды алады және аса қиынға түспейді. Көл қаладан алыс емес, бірақ онда барғанда, өздеріңізді өркениеттен мыңдаған шақырым алыста жүргендей сезінесіздер. Тау пейзажы сондай керемет: көгілдір түсті көл шыршалармен және қарлы тау шыңдарымен қоршалған. Толық жетекті автомобильмен небәрі бір сағат жол жүріп, басқа нақтылыққа тап боласыздар. Көбінесе Алматыда ауа райы жаман болып тұрғанда, көлдің жанында ауа райы тамаша, күн шығып, аспан көкпеңбек болып тұрады.
Қала орталығы
Бұтақтарын қар басқан мәңгі жасыл ағаштар және Алматының қақ ортасында 28 гвардияшыпанфиловшылар атындағы паркте орналасқан Вознесенск соборы — осының бәрі ХІХ ғасырдағы орыс романынан алынған картина сияқты. Осы ахуалға толықтай шому үшін паркте аттар жегілген шанамен серуендеңіздер.
Аяздағы серуеннен кейін жақын маңда, тура сол парктің ішінде, өткен ғасырдың басында салынған ағаш ғимаратта орналасқан Қазақ халық музыкалық аспаптары мұражайында бойларыңызды жылытып алсаңыздар болады. Мұнда сіздер дәстүрлі музыка туралы көптеген қызықты мәліметтерді біліп, қазақ халық аспаптарының үнін ести аласыздар. Мұражай дүйсенбіден басқа күндері, күн сайын сағ. 10:00-ден 19:00-ге дейін жұмыс істейді.
Мәдени бағдарламаны Алматының Абай атындағы Мемлекеттік академиялық опера және балет театрында жалғастыруға болады: 21-23 желтоқсандағы театр репертуарында Чайковскийдің «Щелкунчик» балеті бар, онда Ресей мен Германияның жетекші балет труппаларының жұлдыздары қатысады. Атақты классикалық қойылым сонау 1892 жылы болып өткен премьерасынан бері Рождество мен Жаңа жылдың синониміне айналды. Бағасы 10 мың теңгеден ($27-ға жуық) басталатын билеттер жылдам сатылып кетуі мүмкін, сондықтан ticketon.kz сайтында орын брондауға асығыңыздар.