Құрметті «Эйр Астана» жолаушысы!
Біздің еншілес компаниямыз — Flyarystan лоукостерінің әуе паркі осы айда төрт ұшаққа дейін артады. Осылайша, Алматы және Нұрсұлтан қалаларында орналасқан екі базадан ұшқанда, тасымалдау сыйымдылығы айына
172 800 отыру орнына дейін ұлғаяды. Билеттің орташа құны, салықтар мен алымдарды қоса алғанда, небәрі 14 000 теңгені ($35) құрайды, бұл ретте билеттердің үштен бір бөлігі
10 000 теңгеден төмен бағаға сатылады.
Flyarystan Қазақстан азаматтарына ішкі әуе билеттерін арзан бағамен ұсыну жөніндегі өз уәдесін орындап отыр, саяхаттаушылардың басым көпшілігінің көзқарастары оң, ал ұшақтардың жүктелу коэффициенті 90 пайыздан жоғары. Таяуда Flyarystan Нұр-сұлтан қаласынан Мәскеуден оңтүстікке қарай орналасқан Жуковский қаласына өзінің алғашқы халықаралық рейстерін орындайтын болады.
Ежелгі Жібек жолымен саяхаттау барған сайын танымал бола түсуде, Ташкентке ұшатын «Эйр Астана» рейстерін пайдалана отырып, Самарқанға, Бұхараға және Хиуаға дейін қалай оңай жетуге болатындығы туралы мен жиі айтатынмын. Алайда Жібек жолы бойында Қазақстанның да тарихи аймақ — Түркістанда орналасқан өз інжу-маржандары бар екендігін ұмытпаған жөн. Жақында біз әріптестерімізбен бірге осы аймақтың жігерлі де көреген басшыларымен туристік әлеуетті талқылау мақсатында онда барып қайттық. Қала 2020 жылы аяқталуы тиіс халықаралық әуежай құрылысын қамтитын маңызды жаңару процесінен өтуде. Жергілікті көрікті орындарға бей-жай қалуға болмайды: ұлы Темір дүниеден өткен ежелгі Отырарда ауқымды қазба жұмыстары мен реставрация жүргізілуде. Түркістанда ақын және уағыздаушы Қожа Ахмет Яссауидің сүйегін қою үшін XIV ғасырдың соңында Ақсақ Темір салған кесене бар.
Көршілес Өзбекстандағы ұлы ескерткіштердің кез келгені сияқты, ол да адамға күшті әсер қалдырады, сондай-ақ бүкіл әлемнен келген мұсылмандардың зиярат ететін орны болып табылады. Оңтүстік бағыттағы қысқа сапар ежелгі заманда Яксартес деп аталған, Ұлы Ескендірдің Орталық Азиядағы жорығы Согдианадан (қазіргі Самарқан) солтүстік-шығысқа қарай жылжығанда, жергілікті тайпалардың жойқын қарсылығына ұшыраған ұлы Сырдария өзеніне апарады. Осы керемет ежелгі аймақта саяхаттай отырып, сіздер жақын маңдағы Қызылқұм шөлін кесіп өту үшін әлі күнге дейін сүйікті көлік түрі болып табылатын түйелердің үлкен топтарын көре аласыздар. Жаңа әуежай ашылған соң, Flyarystan Түркістанға ұшу сапарларын бастауды жоспарлап отыр.
«Эйр Астанамен» ұшу сапарларыңыз жайлы болсын!
Ізгі ниетпен