Мамыражай Саар
Германия мен Францияны бір-біріне мүлдем ұқсамайды деп жатады. Ал оларды біріктірсе, не болар еді? Оларды біріктірсе, шұжықшалардың артынан таңдаулы шарап ішетін, бұралаң өзендердің, орманды төбелердің және ерекше деревнялардың арасына түскен бойда күнделікті қам-қарекет өзінен-өзі жойылатын Саар шығады.
Германия көптеген ертегілердің отаны болып табылатындығы рас шығар, бірақ экономикасы мықты дамыған Еуропаның орталығында тұрғанда, бұған сену өте қиын. Алайда Саар — дәл осы Германияның бір тыныш бұрышы, мұнда Ақшақар мен жеті гномның тұруы мүмкін болған деревня үйін аралап жүргенде үш аю туралы ертегі әбден-ақ шындыққа жанасатындай болып көрінеді.
Саар туралы білу керек болатын бірінші нәрсе — бұл оның ерекше екендігі. Екінші дүниежүзілік соғыстан кейін оны қайтадан одақтастар басып алып, француз протектораты болды, тіпті дербес мемлекет ретінде Олимпиада ойындарына қатысып та үлгерді. Бірақ
1950 жылдардан бастап ол Германияның бір бөлігіне айналды және бүгінде көлемі мен халқының саны тұрғысынан оның ең кішкентай аймағы болып табылады. Бірақ, осыған қарамастан, мұнда көптеген қызықты нәрселер бар, сол себепті сіздерге немен айналысуды және алдымен қайда баруды шешу қиынға түседі.
Ең дұрысы, аймақтың астанасы — Саарбрюккеннен бастаған жөн. Онда үлкен қаланың тамашалары да, деревняның әсемдігі де бар. Бұл — Саарды зерттеп бастау үшін мінсіз орын. Ең алдымен, осы аймақтың атағын шығарған тәтті нандарынан дәм татып көріңіздер. Қала орталығындағы Schubert дәмханасына барыңыздар, жергілікті petits fours (глазурьмен жабылған тәтті нандар) ерекше дәмді. Адамдардың сөйлеген сөздеріне құлақ салыңыздар. Бұл — десерттен дәм тата отырып, неміс және француз тілдерінің қоспасына ұқсайтын әуенді және бірегей «саарлендиш» диалектісінен ләззат алуға болатын таңғажайып орын. Айтпақшы, Саардағы адамдардың көпшілігі осы екі тілде тамаша сөйлейді.
Саарбрюккен өзінің өнерімен танымал. Бұл — аймақтың шығармашылық орталығы, оның көшелерінде серуендеп жүріп, көркемсурет галереясын немесе өнер орталығын кездестірмеу мүмкін емес. Міндетті түрде ескі өрт сөндіру станциясының бірегей ғимаратында орналасқан Alte Feuerwache бекетін барып көріңіздер. Бір кездері астында үлкен қызыл машиналар тұрған күмбездердің акустикасы керемет, кеңістігі жеткілікті және көрермендердің симфониялық музыкадан, балеттен, спектакльдер мен опералардан, сондай-ақ қазіргі заманғы эксперименталдық қойылымдардан ләззат алуларына мүмкіндік береді.
Саарбрюккенде мәңгі өмір сүруге болады, бірақ Saarländisches Staatstheater мемлекеттік театрына, Schloss Saarbrücken қорғанына баруды, сондай-ақ schwenker грильде дайындалған бифштексінен дәм татуды ұмытпаңыздар. Егер осылардың қайсыбіреуін өткізіп алсаңыздар, Саардың таңғажайыптығын толық шамада сезіне алмайсыздар.
Өзеннің иілімі, көк-жасыл ағаштармен көмкерілген көгілдір су, отшашудан кейінгі
түтін сынды аспанда қалықтаған бұлттар — осындай керемет көрініс Сааршляйфе
(«Саар өзенінің иілімі» дегенді білдіреді) деп аталатын жер үшін әдеттегі көрініс болып табылады. Ашық хат бетінен түсіп қалғандай әсер қалдыратын Метлах қалашығына жақын маңда (Саарбрюккеннен небәрі 50 километр қашықтықта) ағаштардың артынан төменде ағып жатқан, бәлкім, бүкіл Германиядағы ең таза өзенге тамаша көрініс ашылады. Онда жай ғана осының бәрін тамашалау үшін барып көруге болады. Қыста да Метлах дәл осындай әдемі: көкпеңбек су ирегі қысқы үлпілдеген ақ ұлпа қар мамығын кесіп өтіп, жол салып жатады. Жылырақ киінуді, куртка мен свитер алуды ұмытпаңыздар — жылдың бұл мезгілінде мұнда суық және желді болады.
Бұл — Саарбрюккеннің солтүстік-батыс жағы. Ал шығысында салынғанына бірнеше ғасырдың жүзі болып қалғандықтан, айшықты қасбеттері мен бұралаң көшелері ертегідегідей болып көрінетін сүйкімді қалашықтар мен деревнялар орналасқан. Олардың арасында адасып жүргеннің өзі жақсы. Бақыттарыңызға орай, шын мәнінде адасып кеткен жағдайда, жылы шырайлы және көп тілді жергілікті тұрғындар сіздерге жол табуға қуана-қуана көмектеседі.
Міндетті түрде Саарбрюккеннен 20 километр жерде орналасқан Блискастель қаласына бас сұғыңыздар — жүз жылдық субұрқақтары мен шіркеулері бар бұл қаланың орталығы жанды мұражай сияқты болып көрінеді.
Жанды мұражайлар туралы әңгіме қозғалғандықтан айта кетелік, мұнда басқаларынан елеулі ерекшеленетін бір жер бар. Бұл — Германиядағы ең көне қала болып саналатын Трир қаласы, оның негізі қаланғанына 2000 жылдан астам уақыт болған. Оның айғақтары баршылық. Бұл — Альпінің солтүстігіндегі антикалық қаланың ең жақсы сақталған орасан үлкен қара
Porta Nigra қақпасы, көптеген тауашалары бар римдік Константин базиликасы, Ұлы Константиннің билік еткен кезінде салынған империялық моншалардың қирандылары және солтүстік Еуропада әлі күнге дейін қолданылатын, ең көне, салынғанына
1900 жыл болған Römerbrücke немесе Рим көпірі. Әулие Матиас аббаттығында қасиетті апостол Матфейдің мүрдесінің едәуір бөлігі сақталған, ал Трир соборы Германиядағы ең ескі собор болып табылады деседі.
Бұл тізімді жалғастыра беруге болады.
Қала бойынша экскурсия жасау кезінде телефондарыңыз бен камераларыңыздың батареялары толық қуатталғандығына көз жеткізіңіздер, олар сіздерге қажет болады.
Кем дегенде Трир өлшемі бойынша біршама заманауи құрылыс Kurfürstliches Palais немесе Сайлау сарайы болып табылады. Оны салған адамдар болашақты болжай білген сыңайлы: ерекше ашыққызғылт түсті оңтүстік қасбеті торт бетіндегі қант глазуріне ұқсайды — ол инстаграмм мен әлеуметтік желі әуесқойларына арнап салынған сияқты. Ағаш-бұталары қаулай өскен жасыл бақтарда серуендеңіздер, ерекше мифтік тіршілік иелері бейнеленген мүсіндері бар тыныш тоғанды айналып жүріңіздер.
Тағы бір неғұрлым заманауи жер Карл Маркстің дүниеге келген жері болып табылады. Ол туып-өскен, Брюкенштрасседегі Kurfürstliches сарайынан небәрі бірнеше жүздеген метр жерде орналасқан жұпыны үй мұражайға айналды. Бүгінде ол Қытайдан келген туристердің арасында ерекше танымалдыққа ие.
Трирдің көрікті жерлерін аралап жүргенде, тәбеттеріңіз жылдам ашылады. Тіпті қарындарыңыз ашпаған күннің өзінде Zeitsprung дәмханасына бас сұғыңыздар. Ол дүйсенбіден басқа күндері күн сайын, сағат таңғы 9-дан кешкі 6-ға дейін ашық болады. Мұнда мол көлемде, кешіктіріліп берілетін дәмді таңғы астарды ұсынады. Терезелерден ашылатын көріністің өзі ерекше назар аударуға тұрарлық, өйткені дәмхана Kurfürstliches сарайының бағында орналасқан. Ал далада қар жатқанда, мұнда тіпті де әдемі бола түседі.
Германиядағы қыс — барлық жерде өткізілетін және Рождествоға дейін күн сайын жұмыс істейтін атақты рождестволық жәрмеңкелер немесе Weihnachtsmarkten. Трирде ең үлкен және айшықты жәрмеңке тарихи орталықта өтеді. Міндетті түрде кетчуп пен қыша қосылған дәстүрлі шұжықшалардан, дәстүрлі зімбір пірәндіктерінен және ыстық глинтвейннен дәм татыңыздар. Бұдан басқа, бұл кәдесыйларды — қолдан жасалған бұйымдар мен жергілікті жаңа жылдық әшекейлерді сатып алу үшін мінсіз орын болып табылады. Ал егер сіздер кешкі базарды аралап көргілеріңіз келсе, бірнеше романтикалық орынды табатындарыңыз анық.
Трирден батысқа қарай жүргенде, Люксембургтен шықсаңыздар, оңтүстікке қарай жүргенде, Францияға жетесіздер. Солтүстік-батысқа саяхат сіздерді Бельгияға алып келеді. Бірақ менің кеңесіме құлақ асыңыздар: жақын маңда осыншама елдің бар болуына қарамастан, Саардан кетуге асықпаңыздар. Ағайынды Гриммдердің атақты ертегісіндегі пірәндік үйге тап болған Гензель мен Гретель сияқты, осында міндетті түрде қалғыларыңыз келеді және, бақыттарыңызға орай, сіздерді жауыз жалмауыз кемпір жеп қоюға әрекеттенбейді.
Дәл осы жағдай саны әрқашан туристерден асып түсетін көгершіндерге де қатысты.