Цхалтубоның тірі суы
«Грузияға қыста барудың қажеті қанша?» – деп, күмәндана сұрайтын боларсыздар. Бұл күншуақты елде тосын сыйлардың көп екендігіне және жылдың кез келген мезгілінде тамаша демалу үшін мол мүмкіндіктер сыйлайтындығына сенсеңіздер болады.
Қыста батыл түрде елдің термалды, радонды, минералды курорттарына баруға болады. Мәселен, Кутаисиге жақын маңда, Имеретия аймағында орналасқан Кавказдың ең атақты бальнеологиялық курорттарының бірі — Цхалтубоны алайық. Бұл шипалы қайнаркөз әдебиетте сонау ХІІ ғасырда аталған. Багратион әулетіндегі грузин патшаларының бірнеше ұрпағы өз күштерін дәл осы жерде қалпына келтіргенді ұнататын болған. Кеңес уақытында бұл шағын грузин қалашығына жазда КСРО астанасынан тура жүретін пойыз болған. Бұл жерде әсіресе Мәскеу, Киев, Петербург тұрғындары демалғанды ұнататын. Денсаулықтарын түзеткілері келетін үлкен қалалардың тұрғындары жасыл желекті Цхалтубоны сөзбе-сөз мағынасында басып алатын.
Жеке темір жол тармағы сияқты артықшылық ол кезде тіпті Қара теңіз орналасқан Батумиде де болмаған.
Сөздің реті келгенде айта кетелік, Цхалтубоға іргелес тағы бір су курорты — Саирме орналасқан, оны шетелдіктер аса біле қоймағанмен, ол Грузияның және оның жақын көршілері Әзірбайжан мен Арменияның тұрғындары арасында өте танымал.
Имеретияның таңғажайып орманы
Цхалтубо бальнеологиялық курортын ертегідегідей әдемі таулар қоршап тұр: олар аса биік емес, бірақ орманды. Имеретия өлкесінің барлық спа-кешендері мен шипажайлары 78 гектар аумақты алып жатқан ерекше көркем орманда жасырынған. Саябақтың ауасын ағаш фитонцидтерімен қанықтыратын жасыл қарағайлар, қайыңдар, емендер, үйеңкілер, шынарлар мен жаңғақтар, сондай-ақ өзінің шипалық қасиеттерімен танымал қайнаркөздер бұл жерге туристерді көптеп тартады. Қалың, бұйра джунгли жазда көк-жасыл түске енсе, қыста да таңғажайып түстерге боялады.
Қар Имеретияда сирек жауатын болса да, осы жоталар мен ағаштарды кейде асқан шеберлікпен безендіреді. Бұйра шынарлар мен жайқалған кәрі емендерді көз қарықтыратын аппақ қырау басып, мәңгі жасыл қарағайлардың аяздан жұқа шілтерге оранғанын бір сәт көздеріңізге елестетіп көріңіздерші.
Суға шомылатын жерлердің, қайнаркөзсубұрқақтардың, спорт алаңдары мен бассейндердің айналасындағы кең аллеяларымен бірден курорт ретінде салынған Цхалтубо қалашығын жақсы күтіп-бапталған саябақ аймағы айнала қоршап тұр. Мұнда демалушыларға арналған театр, концерт залы және мұражай бар. Жергілікті саябақтар жыл бойы шамдармен жарықтандырылады.
Осы ертегілік иллюминацияның бәрі таңғажайыпқа сендіріп, мәңгілік мереке сезімін қалыптастырады.
Теңізге жақын орналасуы бұл аймаққа көптеген артықшылықтар сыйлайды. Қыста Имеретиядағы температура +5 oc-тан төмен түспейді, ал қар мүлдем жаумайды десе де болады. Жылдың суық мезгілінде бұл жерде әрқашан Грузияның кез келген аймағындағыдан жылырақ болады, өйткені қалашықты қатты желдерден үш жағынан Самгурали жотасының биік бөктерлері қорғайды, ал теңізден соққан жел жылу әкеледі.
Цхалтубоның тірі суы
Қысқы демалыстың жағымды бонусы — бұл жерде емделу және тұру жазғы уақыттағыдан әлдеқайда, кем дегенде бір жарым-екі есеге арзан болады. Оның үстіне, грузиндік спа-кешендер көршілес елдердегі бәсекелестерінен арзанырақ.
Жергілікті резорттар мен шипажайлар өз қонақтарына жасартатын термалды минералды ванналарды қамтитын көптеген сауықтыру процедураларын ұсынады. Суының құрамында радоны аз ванналарды буын ауруларына немесе ауыр жарақаттардан, сынықтардан және операциялардан кейін қалпына келу үшін қабылдау ұсынылады. Бұдан басқа, олар аллергияның әр түрлі түрлерінен айығуға көмектеседі. Ал құрамында кальцийі, магнийі, азоты бар термалды қайнаркөздерді әдетте кішігірім процедуралар — ингаляциялар, суландырулар, бүркулер үшін қолданады. Жергілікті тұрғындар Цхалтубо минералды сулары ішуге ғана емес, сонымен қатар, көзді шаюға да пайдалы деп сендіреді.
Көркем өңір
Шипалы ванналардан ләззат алып және шипалы қайнар көздерден қуаттанып алған соң таңғажайып Имеретияның төңірегін зерттеуге аттаныңыздар. Курорттың жанында динозаврлардың іздері сақталған ежелгі карст үңгірлері мен көпір үстінде шыныдан жасалған мөлдір шолу алаңы бар Сатаплиа қорығы орналасқан.
Сіздер Прометей үңгірі ретінде көбірек белгілі Кумиставидегі иллюминацияларға, сталактиттерге және тасқа айналған сарқырамаларға тәнті боласыздар. Олардың бір бөлігінен жер асты көлінде қайықпен жүзіп өтуге болады. Айтпақшы, бұл өлкедегі барлық үңгірлердің қосымша емдік әсері бар. Спелеологтардың айтуынша, тұздарға қаныққан құрғақ ауасы бар бірегей микроклимат тыныс алу мүшелері, невроздар мен гипертонияны емдеу үшін өте пайдалы.
Консольды көпірі бар таңғажайып
Окаце каньоны оның қабырғасымен оңай серуендеуге мүмкіндік береді, ал Кинчха сарқырамаларының тұтас каскады, сіздер мұнда жылдың қай мезгілінде келсеңіздер де, ұмытылмас әсер қалдырады.
Барлық осы керемет табиғи сұлулық елдің ең ежелгі қаласы (әлемдегі ең көне қалалардың бестігіне кіреді) және Грузияның екінші үлкен қаласы — Кутаисидің жанынан табылады.
Кутаиси сіздерді православиелік грузиндер бірлігінің нышаны болып табылатын сәулетті Баграти ғибадатханасы зорайып көрініп тұрған төбеден ашылатын әсем көріністерімен қуантады.
Цхалтубо — Кутаиси қаласынан небәрі 9 километр қашықтықта орналасқан қала маңы. Қаласаңыздар, сіздер Кутаисиде тоқтай аласыздар, ал қас қарайғанша қатынайтын маршруттық такси сіздерді Цхалтубодағы кез келген процедураға алып барады.
Осы қалаларға жақын маңдағы әсем тауларда туристердің барып көруіне ашық Гелати және Моцамета ерлер монастырьлері орналасқан. Барлық жерлерде жоғарыдан керемет көріністер ашылады, ал төменде жергілікті тұрғындардан әрқашан тауда жиналған дәмді жөке балын және керемет інжір немесе алхоры тосабын сатып алуға болады.