Әлия Орман, блогер
Қайда демалу туралы сұрақ туындағанда, жұбайым екеуміздің таңдауымыз көбінесе Куала-лумпурға түседі. Куала-лумпур — қарама-қайшылықтар қаласы. Мұнда футуристік ғимараттар қаланың кедей аудандарымен іргелес орналасқан, ал малайлықтардың ағаштан жасалған ұлттық үйлері қаланың қақ ортасында, Petronas мұнарасынан жаяу жүріспен бес минуттық жерде орналасқан. Айтпақшы, егіз мұнаралардағы көпірден, Menara мұнарасынан сияқты, қалаға тамаша көрініс ашылады. Соңғысында 300 метрдей биіктікте орналасқан айналмалы ресторанда түстенуге болады. Сансыз көп парктерде құмардан шыға серуендеп болған соң, көше дәмханасына бас сұғып, өте арзан және дәмді малайлық және үнділік тағамдардан кешкі ас ішуге болады. Бұл жер қарама-қайшылықтарға толы: Masjid Jamek мешітінде жанға жайлы тыныштық орнаса, жақын маңдағы China Town қалашығында абыр-сабыр, қарбалас. Жаңа ғана Batu үңгірлерінің баспалдақтарымен жоғары көтеріліп келе жатып, аптап ыстықтан әлсіреп, табиғат пен ғибадатхананың сұлулығына тамсанып, маймылдарға сүйсіне қарап келе жатсаң, дәл сол күні, көлікті жалға алып, әркім өз жанының қалағанын: ойын-сауықтар паркіндегі экстримді, казиноны, дүкен аралауды немесе жай ғана тамаша көріністе, теңіз деңгейінен 2 мың метрден астам биіктіктегі тауларда демалуды таба алатын салқын жерге — Genting Highlands кешеніне қарай зымырап бара жатасың.