Дина Жанботаева, маркетолог
Сіздерге қаланы аралап жүргенде, әр бұрылыстың артында әлдебір таңғажайып нәрсе күтіп тұрғандай болатын сиқырлы сезім таныс па? Олай болмаса, Санфранцискоға аттаныңыздар!
Жергілікті тұрғындар оны еркелетіп Frisco деп атайды. Мен үшін бұл атау мұхиттан есетін лептің, адамның ой еркіндігі мен шексіз мүмкіндіктерінің нышаны болып табылады. Бұл қалада әркім өз қалағанын табады. Ал іздеуді мен Golden Gate паркіне барудан бастауға кеңес беремін, онда сіздер алдымен Conservatorium of Flowers бағын аралап, содан соң Japanese Tea Garden бағының ерекше ахуалына шома аласыздар. Парктің соңына дейін жетсеңіздер, Тынық мұхиттың жағасына шығасыздар, мұнда су тамшыларының өзі табиғат заңдарына бағынудан қалып, ауада ілініп тұрғандай әсер қалдырады. Осы жердегі Cliff House ресторанында түстеніп, күн көзінің мұхиттың тұнығына жаймен батып бара жатқанын бақылауға болады.
Қаланың ең басты көрікті орны — Golden Gate Bridge көпіріне жеткен кезде, сіздер одан жаяу, велосипедпен немесе автомобильмен өте аласыздар. Ал көпірдің арғы бетінде сіздерді әлемдегі ең биік ағаштар — секвойялар өсетін Muir Woods қорығы күтеді. Солтүстікке қарай көлікпен тағы біршама жер жүріп өтсеңіздер, Napa Valley жүзім алқабына жетесіздер, мұнда ескілікті шарап қоймаларын аралап, әуе шарларында ұшуға болады.
Сан-франциско — армандар орындалатын қала, сондықтан өздеріңізбен бірге жақсы көңіл-күйлеріңіз бен таңғажайыпқа деген сенімдеріңізді алып, солтүстік Калифорнияға саяхатқа аттаныңыздар.