Құрметті Air Astana жолаушысы!
Саяхатшылар Түркістаннан солтүстік-батысқа қарай жаңа трассаның 45-ші шақырымында одан бұрылады. Асфальтталмаған жолмен біраз жүргеннен кейін олар жарым-жартылай қалпына келтірілген қақпа мен шығысқа қарай созылып жатқан жалпақ орға ұқсайтын нәрсенің шетіндегі дөңгелек мұнараны көреді. Қақпадан өткенде, алдарынан симметриялы орналасқан және ішінара қазылған көшелер мен ғимараттардың 10 шаршы шақырымға жуық аумағын қоршап тұрған сыртқы бекіністердің қираған үйінділері шығады. Әдемілігімен ерекшелене қоймайтын, бірақ қысқы күннің батуы аясында үнсіз мелшиген тісті бекіністері көлеңкелерімен денеңді дірілдетіп, тіпті бойыңа үрей ұялататын Сауранға қош келдіңіздер. Жібек жолының солтүстік бөлігінде ең гүлденген ежелгі қоныстардың бірі болған, кейіннен отқа оранып, апатты бастан кешкен ол тоң боп қатқан жазық дала төсінде елесті қарауылдай болып көрінеді. Өзінің неғұрлым танымал егізі Отырармен салыстырғанда, азырақ қалпына келтірілген, демек, сыры да толық ашылмаған, оңтүстікшығысқа қарай орналасқан Сауран тарихы дәл осындай қайғылы мекен болған. Монғолдардың талан-таражынан кейін қайта қалпына келіп,
XVIII ғасырдың басында жоңғарлар түбегейлі қиратқанға дейін ол Қазақ хандығының маңызды қаласы болды.
Сауран — осыдан бір жыл бұрын осы парақтарда айтып өткенімдей, қарқынды түрде дамып, кез келген бюджетке арналған қонақ үйлер, мектептер, университеттер, тұрғын үй кешендері, саябақтар бой көтерген Түркістан төңірегіндегі таңғажайып орындардың бірі ғана. Осының бәрі — Қазақстан тарихында із қалдырған көптеген көрнекті саясат, дін, өнер және ғылым қайраткерлері жер қойнына тапсырылған жерде, әлемнің түкпір-түкпірінен зиярат етушілер ағылып келетін, XІV ғасырда тұрғызылған Қожа Ахмет Яссауи кесенесінің айналасында жақсылап жоспарланған және талғаммен салынған, өсіп келе жатқан кластерде. Өткен жылдың желтоқсан айында мұнда жаңа әуежай ашылды, Нұр-сұлтан қаласынан A320 лайнерімен Flyarystan әуе компаниясының алғашқы коммерциялық рейсін сүйемелдеп ұшуымның сәті түсті. Flyarystan ұшақтары қазір мұнда Алматыдан да, Нұр-сұлтаннан да ұшады, осынау ежелгі мекендер бүгінде оңай қолжетімді болғандықтан, барып көруге әбден тұрады.
Сіздерге және отбасыларыңызға бақытты Жаңа жыл тілеймін. 2021 жылы бәрі жақсы болады деп үміттенемін. Ұшу сапарларыңыз сәтті болсын!
Құрметпен,