Шымбұлақтағы
Қысқы драйв
2260 метр биіктіктегі Шымбұлақ таулы курорты — Алматының әдемі символы және Іле Алатауындағы аттас шатқалдың сәнін кіргізетін ажары ғана емес. Қыста әйгілі курорт өзінің күншуақты жұмсақ климатының арқасында алматылықтар мен қала қонақтары үшін демалыс күнінің сүйікті маршрутына айналады.
Жыл сайын Алматының төңірегінде жаңа тартымды туристік кешендердің пайда болатындығына қарамастан, ең ескі Шымбұлақ таулы курорты шаңғы, фрирайд, фристайл және басқа да белсенді қысқы ойын-сауықтардың әуесқойларын өзіне магнитше тартып, бәрібір солардың арасындағы ең танымалы болып қала береді. Өйткені тек осы жерде Медеу мұзайдыны мен бәрі алақандағыдай көрінетін Шымбұлақтың арасындағы заманауи гондолды арқан жолымен жүріп өтіп, жол-жөнекей 3200 метр биіктіктегі Талғар асуы шыңының ғажайып көріністерін тамашалауға, содан соң шаңғымен, ледянкамен, баллондармен сырғанаудан ләззат алуға немесе кез келген басқа қолайлы ойын-сауықты таңдауға болады.
Курорт өз қонақтарына жылдың кез келген мезгілінде арқан паркі қызметтерін, бойды сергітетін атпен серуендеуді, нұсқаушы-ұшқышпен бірге парапланда ұшуды, альпинистерге арналған экстремалды паркті, квадроциклмен турларды, қызықты тау маршруттарын және тәжірибелі гидтер алып жүретін шыңға шығуларды ұсынады.
Қараша айынан сәуір айына дейін тұрақты қар жамылғысы болатын Шымбұлақ беткейлерінің әр алуан бедері шаңғыға енді тұрып, сырғанауды үйренген жаңадан бастаған спортшылар үшін де, тәжірибелі спортшылар үшін де өте ыңғайлы. Мұнда кез келген шеберлік
деңгейіне арналған беткейлер мен трассалар: жаңадан бастаушыларға — көлбеулеу, машықтанған спортшыларға — ұзын, экстремалдарға — бас айналдырарлықтай шұғыл бұрылысты қия жолдар, сондай-ақ могулға арналған арнайы трасса бар. Айтпақшы, жылдамдықпен түсетін және алып слалом жергілікті трассалары әлемдегі ең күрделі трассалардың ондығына кіреді.
Курорттың тағы бір жағымды бонусы — түнде шаңғы тебу мүмкіндігі: тәуліктің қараңғы мезгілінде барлық трассалар тамаша жарықтандырылады. Балалары бар туристерге мұнда бүлдіршіндермен жұмыс істейтін кәсіби нұсқаушылары бар балалар паркінің қызметі ұсынылады. Ал ересектерге осы мақсатта тау шаңғысы мен сноубордтан жеке меншік мектеп ашылған.
Шымбұлақ — Алматының ең сәтті инновациялық туристік жобаларының бірі, соның арқасында қала қазірдің өзінде Орталық Азиядағы танымал қысқы демалыс орталығы атағына ие болды.
КУРОРТ ТАРИХЫНАН
Шымбұлақ топонимінің шығу тегі туралы айтатын болсақ, «шым» сөзі мүкті, шөпті, шымды білдірсе, «бұлақ» сөзі өзінің тікелей мағынасында қолданылады. Рас, атаудың шығу тегінің стандартты емес нұсқалары да кездеседі. Мәселен, кейбір зерттеушілер жұмбақ болып қалатын Шамбала мифтік елімен әр түрлі параллельдер жүргізе отырып, Шамбала және Шымбұлақ сөздерінің түбірі бір деп сендіреді.
Спорттық тау шаңғысы курортының негізі 1954 жылы, алғашқы бугельді арқан жолы құрылған мезеттен бастап қаланды. Сол алғашқы жол мұнда соғыстан кейін Альпіден бөлшектелген күйінде әскери олжа ретінде әкелінді. КСРО-НЫҢ тау шаңғысынан жетекші жаттықтырушылары
Кавказ, Заполярье, Закарпатье және Іле Алатауы тауларындағы жылдамдықпен түсетін трассалардың бедерлерін зерттей және салыстыра келіп, бугельді арқан жолын нақ осы біздің тауларымызда орнату туралы шешім қабылдады: мұндағы жағдайлар ең қолайлы болып шықты.
Ал 1983 жылдан бастап база кеңестік тау шаңғышыларын олимпиадалық даярлау орталығы ретінде қолданыла бастады. Шымбұлақ баурайында КСРО және Қазақстан чемпионаттары өткізілді. Жыл сайын ақпан айының басында Шымбұлақта тау шаңғышылары КСРОНЫҢ 11 дүркін чемпионы, спорт шебері, 1956 жылғы Олимпиада ойындарының қатысушысы Александра Артеменко жүлдесі үшін жарысады.
ЖАҢА МАУСЫМ ҚОНАҚТАРДЫ НЕСІМЕН ҚУАНТАДЫ
Жаңа маусымда танымал курорт қонақтарды бірқатар ыңғайлы техникалық және ойын-сауық жаңалықтарымен қарсы алмақ. Бұл — жалға берілетін жабдықтар тізімінің едәуір кеңеюі, неғұрлым ыңғайлы мобильді қолданбаның әзірленуі, трассаларда жасанды қар жасаудың жаңа жүйесі, Тіл мұздығына тамаша көрініс ашылатын жаңа панорамалық алаң, ратракпен қызықты экскурсия, тау шаңғысымен және сноубордпен сырғанаудан нұсқаушыларды онлайнброндауға арналған жаңа қолданба. Онлайн-брондаудың жаттықтырушымен жеке жұмыс жасағысы келетін қонақтар үшін қарастырылғандығын есте ұстаған жөн.
Қонақтарға жылдам қызмет көрсету үшін барлық жалдау қызметтерін курорттың бірыңғай цифрлық инфрақұрылымына біріктірген жаңа бағдарламалық жасақтама сатып алынды. Туристерге барынша ыңғайлы болуы үшін жабдықтар мен киімдерді сақтау камераларының орналасу аймақтары да өзгерді.
Shymbulak Mountain Resort мобильді қолданбасы сіздерге абонементтерді онлайн брондап, өз сырғанауларыңызды алдын ала ұйымдастыруға мүмкіндік береді. Онда курорттағы іс-шаралар мен қонақ үйлер туралы ақпаратпен танысуға болады.
Трассаларда жасанды қар жасау заманауи жүйесінің арқасында курорттағы қысқы маусым енді алты айға дейін созылады. Сол жақ Талғар бағытында
магистральдің жаңа тармағын салу жұмыстары аяқталды. Енді қар жасауға «Солнечная долина», «Зеленая поляна» және «Дядя Богданович» трассалары қолжетімді, олар жаңа маусымда негізгі трассалармен бірге ашылады. Қар паркінің Сол жақ Талғар асуына ауысуы курортқа беткейдің жаппай сырғанауға арналған алаңын едәуір кеңейтуге мүмкіндік берді. Қар паркінің қонақтары үшін ең кішкентай келушілерді көтеруге арналған жайлы беби-лифт орнатылды.
Сонымен қатар, әрине, бүгінгі күннің нақтылығын ескере отырып, курорт әкімшілігі қонақтардан карантин кезінде келудің санитарлық ережелерін сақтауды өтініп сұрайды, олар: міндетті түрде медициналық маска кию; 37 градустан жоғары температурамен келмеу; барлық объектілерде келушілер арасында екі метр арақашықтық сақтау. Кабиналардағы отыру орындары — 4 адамға дейін (бір отбасы мүшелерін қоспағанда, олардың саны бесеу болуы мүмкін), кафедегі отыру орындары 50 адамға дейін қысқартылды.
Кассаларда кезек тудырмау үшін билеттер мен абонементтерді курорттың shymbulak.com ресми сайтында немесе Shymbulak Mountain Resort мобильді қолданбасы арқылы алдын ала сатып алыңыздар.