Таңғажайып Бонн
Батыс Германияның бұрынғы астанасы — Боннда қорғандар да, кафелер де, керемет мұражайлар да бар. Бәлкім, бұл Германиядағы ең жете бағаланбаған қалалардың бірі болар.
Шындығын айтқанда, өткен ғасырдың соңында Бонн қиын кезеңдерді бастан кешті. Германия біріккеннен кейін ол Берлиннің пайдасына өзінің астана мәртебесінен, сондай-ақ халықаралық беделінің едәуір бөлігінен айырылды. Бұған қоса, 1990-шы жылдарда мұнда қала арқылы өтетін Рейн өзенінің бұрын-соңды болмаған тасуы себебінен соңғы жүз жылдағы ең күшті су тасқыны орын алып, елеулі зиян келтірді.
Бірақ бұдан кейін Бонн әрқашан қолынан жақсы келетін нәрсесін жасады: қалпына келіп, қайта гүлденді. 2000 жылға жуық уақыт бұрын жергілікті гарнизонды тонаушылар басып алған Рим империясы кезінен осылай болып келеді. Әр жолы мұнда өткеннің бір бөлігі сақталып қалады.
Бірақ ретімен бастайық. Франкфуртта қонғаннан кейін батыстағы Боннға көлікпен жетуге болады. Неміс жолдары туралы аңыздар айтылады, алайда, қалыптасқан пікірге қарамастан, автобанда жоғары жылдамдықпен жүйткуге болмайды. Ал енді пойызбен саяхат, шынында да, сіздердің естеріңізде қалады.
Deutsche Bahn — Германиядағы ең ірі темір жол компаниясы. Пойыздары таза, заманауи, жайлы, әдетте уақтылы келеді. Бонн Франкфурт пен Кельннің арасында орналасқан, сондықтан ол арқылы тікелей қатынайтын пойыздар күн сайын көптеп жүреді.
Оның үстіне, пойызбен саяхаттау сіздерге табиғаттың сұлулығынан және көк шалғынды далалар мен ормандардың үстінен тас шіркеулері қылтиып тұрған деревнялардың көріністерінен ләззат алуға мүмкіндік береді — бәрі суреттегідей немесе ертегідегідей. Осының бәрін вагон-ресторанда (мұндай вагондар көп пойыздарда болады) дәмді кофеден немесе ыстық шоколадтан ұрттап қойып, тамашаласаңыздар, жағымды әсерлер күшейе түседі.
Егер сіздер пойызбен саяхаттасаңыздар, ол сіздерді сүп-сүйкімді (бірақ әлемдегі ең ірі экономикалардың бірін иеленетін елдің бұрынғы астанасы үшін таңқаларлықтай шағын) орталық вокзалға жеткізеді. Бұл —
қаламен танысуды бастауға тамаша орын, өйткені вокзал Альтштадтпен немесе Ескі қаламен шекарада орналасқан.
Бұл — тарихы бай аудан, мұнда тас төселген көшелермен серуендеп, дүкендерге, ресторандар мен кафелерге бас сұғуға болады.
Bonner Münster кафедралдық соборы — Германиядағы ең ежелгі және әдемі ғибадатханалардың бірі, оның аспанға шаншылған өткір ұшты мұнаралары, оп-оңай адасуға болатын ирелең жолдарда күтпеген жерден жол таппай қиналып қалсаңыздар, тамаша бағдар болады. Альтштадттың өзі былай да танымал, оның үстіне, Людвиг ван Бетховен дәл осы жерде дүние есігін ашқан.
Иә, әлемге әйгілі композитор 1770 жылы Боннда дүниеге келген. Базар алаңының жанында орналасқан, композитордың балалық шағы өткен үйде ол туралы және оның музыкасы туралы білуге болатын мұражай бар. Осы жерге жақын маңайда 1770-ші жылдары салынған рококо стиліндегі Ратуша орналасқан; оны да барып көруге тұрады.
Бонның кейінгі тарихы белгілі бір жастағы адамдардың есінде жақсы сақталған шығар. Екінші дүниежүзілік соғыстан кейін қала Батыс Германияның астанасы болады деген шешім қабылданып, Шығыс және Батыс Германия біріккенге дейін ол осы мәртебесінде болды. Көптеген мемлекеттік мекемелер әлі күнге дейін Бонн қаласында орналасқан.
Бундесхаус — парламент отырған ғимарат, ал Хаммершмидт әдемі вилласында ГФР президенті (канцлер лауазымынан айырмашылығы, бұл — номиналды лауазым) тұрған. Екі ғимаратты да барып көруге болады.
Бонның қазіргі тарихы туралы көбірек білуге болатын тамаша орын — Haus der Geschichte мұражайы немесе Тарих үйі, онда неміс саяси карикатурасының көрмесін көруге болады.
Басқа көрнекіліктермен танысу үшін Koenig мұражайына барыңыздар. Ол балаларға ұнайды, өйткені мұнда тұтас динозаврдың қаңқасы қойылған. Мұражай жануарлар мен өсімдіктерді зерттеуге арналған. Мұнда, көптеген экспонаттардан басқа, классика мен модерн үйлесім тапқан керемет артихектура сіздердің назарларыңызды өзіне аударады.
Барып көруге тұрарлық тағы бір мұражай — Frauenmuseum немесе Әйелдер мұражайы. Мұнда суретші әйелдердің жұмыстары қойылып, үнемі көрмелер өткізіліп тұрады. Бұл — Германиядағы мәдениеттің дамуына әйелдердің қосқан
үлесі туралы білудің тамаша мүмкіндігі. Бұл өте прогрессивті ел екендігіне қарамастан, осы таяу уақыттың өзінде мұнда әйелдердің құқықтары сонша көп болмаған.
Мұражайлар мен көрікті жерлерді аралап шыққанша, қарындарыңыз да ашады. Бонн бұрынғы астана болғандықтан, тағамдары да кәдімгі жай қаладағыдан гөрі сан алуан болып келеді.
Германия өзінің шницельдерімен танымал, бұл — қуырылған тауық етінің, күркетауық етінің, сиыр немесе шошқа етінің жұқа тілімдері. Нұсқалары көп, бірақ қыстың суық күнінде саңырауқұлақ қосып, кілегейлі тұздықта дайындалған, тойымды және іштен жылытатын rahmschnitzel шницелінің дәмін татып көрген жөн. Бұл шницельдің дәмін татып көруге болатын ең жақсы орындардың бірі — Bönnsch. Ескі қаладағы Sterntorbrücke көшесінде орналасқан бұл ресторанда өз сыраларын қайнатады және шницельмен бірге тамаша фри картобын ұсынады.
Бұл жер тәттіқұмарларға да ұнайды: бүкіл әлемге өзінің желатинді қонжықтарымен танылған Haribo компаниясының штаб-пәтері Боннда орналасқан. Сіздер тіпті фабрикаға экскурсияға барып, әйгілі тәттілердің қалай жасалатынын көре аласыздар, тек қана мұның мүмкін болатындығына алдын ала көз жеткізіп алыңыздар — пандемия кезіндегі шектеулерге байланысты ережелер өзгеруі де мүмкін.
Бонн Рейннің жағасында орналасқан, онда круиз жасау қатарға қосылу рәсімінен
өтумен барабар. Көптеген компаниялар тіпті қыс мезгілінде де қысқа сапарларды ұсынады. Бұл — қаланы әр түрлі қырларынан көрудің тамаша тәсілі.
Қаланы тамашалаудың тағы бір тәсілі — жете бағаланбай жүрген қала маңындағы Венусбергке бару. Ол Боннға керемет көрініс ашылатын төбе басында орналасқан. Бас сұғуға тұрарлық жайлы кафелері, пабтары мен ресторандары бар жылы шырайлы деревняда серуендеңіздер. Солардың ең жақсыларының бірі — Mauel. Аурухананың жанындағы бұрышта орналасқан Sigmund-freud-straße және Sertürnerstraße шағын кафесі мен нантоқаш дүкенінде керемет латте кофесін, жаңа пісірілген шоколадты өнімдер мен торттарды ұсынады. Қысқаша айтқанда, жылыну үшін қажеттінің бәрі бар.
Венусбергтен Коттенфорстқа баруға болады. Үлкен жасыл орманда жүрген кезде ең алдымен ойларыңызға келетіні — сіздер өздеріңізді ертегіге тап болғандай сезінесіздер. Бақыттарыңызға орай, мұнда зымиян мыстан кемпірлер мен ауызынан от шашатын айдаһарлар жоқ, сондықтан еш алаңдамасаңыздар да болады.
Айтпақшы, айдаһарлар туралы: бірнеше көпірдің бірімен және Германиядағы ежелгі тісті темір жол — Drachenfels темір жолы арқылы Рейннің екінші жағалауына өтіңіздер. Содан соң төбелерді бойлай Schloss Drachenburg — Драхенбург қорғанына көтеріліңіздер. Бұл жерде әсіресе қыста таңғажайып көрініс ашылады. Атауының өзі қиялыңды қоздырады: drachen неміс тілінен аударғанда — «айдаһар», ал
burg «бекініс» дегенді білдіреді. Мұнда нағыз айдаһарлар жоқ (біздің білуімізше), сондықтан еш қорықпаңыздар, бірақ қорғанның өзі Дисней фильмдеріндегі өрнек суретке ұқсайды. Қорғанды аралап, экскурсия жасауға және жергілікті ресторанда жеңіл-желпі тамақтанып алуға болады. Кім нағыз қорғанда түскі немесе кешкі ас ішкендігін айтып мақтанғысы келмейді?
Ежелгі Godesburg бекінісі де шабыттандырады. Ол 1583 жылы толықтай дерлік бұзылып, бірақ кейін қалпына келтірілді. Мұнда ресторан да бар, ол Бонның орталығына жақын орналасқан.
Бонн одан гөрі үлкенірек Кельн қаласына жақын орналасқандықтан (олардың арасында электр пойыздары жүреді, сондықтан бір қаладан екінші қалаға бару еш қиындық тудырмайды), Боннды туристер көбінесе айналып өтеді. Бірақ бұдан сіздер тек қана пайда көресіздер: жергілікті көрнекіліктерге кезек аз болады. Әрі-беріден соң демалыс босаңсып, демалу үшін берілмей ме?