Қысқы ертегі өлкесі
Нұр-сұлтанға жолдарыңыз түсіп, табиғат аясында демалмақ болып шешсеңіздер, ең алдымен Бурабайға немесе Зерендіге, аяз бен күн өлкесіне, қысқы ертегі өлкесіне аттаныңыздар.
Қазақстанның елордасынан солтүстікке қарай 250 км мінсіз жол сіздерді Қазақстанның інжу-маржаны — Бурабай ұлттық табиғи саябағына алып барады. Щучинск қаласына жете бергенде-ақ сіздер бүкіл саябақты қоршап тұрған қалың қарағайлы орманды көресіздер. Мұнда қарағайлардың арасында серуендеп, қылқан жапырақтылардың хош иісіне толы таза ауамен тыныс алу жандарыңызға жағады.
Бұл жер туралы аңыз да бар. Құдай әлемді жаратқанда, біреулер — әдемі тауларға, біреулер — құнарлы жерлерге, енді біреулер қалың ормандарға ие болған деседі. Ал бұл жердің адамдарына тек шетсізшексіз дала ғана тиеді. Сол кезде олар жаратушыдан басқа халықтарда бар табиғат сұлулығынан аз да болса сұрау үшін келеді. Құдай келісіп, сыйлықтар қапшығына қолын салса, ештеңе дерлік қалмаған болып шығады. Қапшықтың ең түбінде аласа жартастар мен таулар, бірнеше таза бұлақтар мен мөлдір көлдер, шағын орман жатады. Жаратушы барлығын алақанына салып жинап, қазақ даласының ортасына тастайды. Осылайша, Қазақстандағы ең әдемі жерлердің бірі — Бурабай әсем өлкесі пайда болады.
Бурабайдың әсемдігі қарағайлы орманында ғана емес, сонымен қатар, көркем таулары мен көлдерінде. Саябақ аумағында 14 көл орналасқан, солардың ішіндегі ең әйгілілері Шортанды, Бурабай, Үлкен және Кіші Шабақты,
Қатаркөл, Майбалық көлдері болып табылады. Жазда мұнда жағажай маусымы ашылады, Бурабай көлінде — қалалық жағажай, ал жағалаудағы қонақ үйлерде өздерінің жеке меншік жағажайлары бар. Көлдегі су әрдайым салқын, бірақ бұл туристерді тоқтата алмайды, олар мұнда, әсіресе жаздың ыстық күндерінде қуана-қуана келеді.
Бурабай көлі Жұмбақтас тас аралымен әйгілі. Туристер дәл осы Жұмбақтасты суретке көп түсіреді. Шығанақ ортасындағы тас үйіндісінің бұлай аталу себебі — оның жоғарғы жағы әр түрлі қырларынан біресе кәрі кемпірдің, біресе жас қыздың бейнесін еске түсіретін адамның басына ұқсайды.
Көлдің жанында Оқжетпес тауы бар. Аңыздардың бірі бойынша, тұтқынға түскен жас сұлу қалмақ қызын күйеуге шығу үшін сарбаздардың бірін таңдауға
мәжбүрлейді. Қыз орамалын қолына ұстап, таудың басына шығады да, «Кімнің жебесі орамалға жетсе, соған өмірлік жар боламын», – дейді. Ең епті жігіттер тау етегіне жиналып, жебелерін ата бастайды, бірақ бірде-бір жебе шыңға жетпейді. Сол кезде қызға төменге түсу туралы бұйрық беріледі, бірақ ол өз дегенін жасап, жартастан тікелей көлге секіреді. Сұлу қыз құлаған жерде Жұмбақтас тас аралы пайда болып, ол секірген тау Оқжетпес деп аталады.
Саябақтың бүкіл аумағында биіктігі әр түрлі тау сілемдері орналасқан. Көкшетау тауының маңындағы жер жаяу серуендер мен тау жорықтарын жақсы көретіндер үшін тамаша орын болып табылады. Осы таудың ең биік
нүктесі — шыңы теңіз деңгейінен
947 метр биіктікте орналасқан.
Өрлеудің басталатын жері — Абылай хан алаңы. Бір кездері осы таудың етегінде оның ордасы болған. Бәлкім, бұл туристер арасында Жұмбақтастан кейінгі екінші танымал орын болар. Қазір мұнда стела, сондайақ тақ пішініндегі тас орнатылған. Адамдардың сенуінше, тасты бірнеше рет айналып өткен адамның тілегі міндетті түрде орындалады.
Көкшетау тауына ұлттық парктің гидімен бірге ғана көтерілуге рұқсат етіледі. Тауға көтерілетін арнайы соқпақ жол жоқ, борпылдақ топырақпен, содан соң жартастармен көтерілуге тура келеді. Ең жоғарғы жағында қатты желдің, үшкір және тайғанақ жартастардың болуы себебінен қауіпті болуы мүмкін. Таудың ұшар басынан бүкіл алқаптың панорамалық көрінісі ашылады. Экстремалды көтерілуден қорықсаңыздар, мұнда неғұрлым жазық және соншалықты биік емес басқа шыңдар да бар, ол жерлерден де әдемілігі еш кем емес көріністер ашылады. Мысалы, сіздер Бөлектау тауына көтеріле аласыздар: оның маршруты қиын емес, әрі дәл осы жерден Бурабай көлі мен Көкшетау тауына қарайтын атақты көрініс ашылады.
Бурабай кенті жазда көптеген қонақ үйлер, мейманханалар, кафелер мен барлар жұмыс істейтін нағыз курорттық аймаққа айналады. Маусымаралық кезеңде, әсіресе қыста бұл жерде өте тыныш болады. Жыл бойы жұмыс істейтін қонақ үйлер мен курорттар көп емес, сондықтан қыс мезгілі оңашалануды ұнататындар үшін өте қолайлы. Шортанды көлінің жағасында жергілікті спа орталықтарында демалып, күш жинауға болатын Rixos Borovoe қонақ үйі орналасқан.
Қыста көлдер қатады, егер мұздың жақсы жерін тапсаңыздар, конькимен сырғанауға немесе қысқы мұз астынан балық аулаумен айналысуға болады. Балалар мен жаңадан бастаған шаңғышыларға көңілді болатын бірнеше шағын шаңғы базалары бар. «Ақжелкен» шипажайының аумағында шаңғышыларға және шанамен сырғанаушыларға арналған шағын төбе бар. Щучинсктен әрі бір бугельді көтергіші бар «Нұр-тау» базасы жұмыс істейді. Ал одан әрі қарай жүрсеңіздер, Көкшетау қаласының сыртында
«Елікті» тау шаңғысы курорты орналасқан.
Зеренді сәл әрірек, Нұр-сұлтан қаласынан солтүстікке қарай 320 км жерде орналасқан. Қылқан жапырақты және жапырақты ормандармен қоршалған бұл мөлдір таза көл Қазақстанның әр түрлі аймақтарынан және таяу шет елдерден туристерді
тартады. Мұнда таза ауамен дем алудан және табиғат сұлулығынан ләззат алып, серуендеуге ғана емес, балық аулаумен айналысуға да болады.
Зеренді көлінің жағасын бойлай әр түрлі бюджетке арналған демалыс үйлері мен қонақ үйлер орналасқан. Егер сіздер жайлылықты қаласаңыздар, жыл он екі ай жұмыс істейтін Aurora Garden және «Зерен» демалыс аймақтарына назар аударғандарыңыз жөн.
Қыс — үйде отыруға себеп емес, жылы киімдеріңізді алып, өздеріңіз үшін Қазақстанның қарлы өлкесіндегі табиғат сұлулығын ашуға аттаныңыздар!