Аджария Мандарин жұмағы

Аджария, ол қандай? Бұл жерлерде бір рет болсын болып көрген адам Қара теңіздің жұмсақ толқындарын, хош иісті мандарин плантацияларын, тулап аққан мөлдір таза сарқырамаларды, жартасты көріністерді және шамшат бақтарының жасыл барқыт желегін ешқашан ұмытпайды.

Мұнда сіздер цитрус жемістерінің күзге таман толысып піскенін, кәдімгі жолдардың бойында інжір, мушмула және фейхоа жемістерінің өсіп тұрғанын тамашалап, көкірек кере тыныс аласыздар. Мұнда грузин халқының көп үнді ғажайып әуені мен таулықтардың делебені қоздыратын биінен ләззат алып, жандарыңыз жадырайды. Аджария — курорттық Грузиядағы ең әдемі бұрыштардың бірі. Және бұл тіпті де Сакартвелодағы (грузиндердің өздері елді осылай атайды) басқа жерлердің онша тартымды болмауынан емес. Бұл тек сұлу Қара теңіздің толқындары тербеліп, әлемнің түкпір-түкпірінен туристерді магнитше тартуына байланысты. Теңіз осынау онсыз да әсем өлкеге дыбыстардың, түстердің және дәмдердің жалпы грузиндік симфониясындағы ерекше айшықты үнді қосты.

Бірақ туристерді демалыстың қымбат уақытын осы жерде өткізуге шақырып, еліктіретін жалғыз теңіз ғана емес. Бұл өлкенің ландшафттармен де жолы болған: айнала жағалай қоршаған тамсандырар тамаша көріністерімен туристерді барлық курорттар таң қалдыра алмайды. Жап-жасыл таулар, көгілдір теңіз, мандарин ормандары — осынау кереметтің барлығы бір жерге жиналып, көзіңді қуантады, жүректі өбіп аймалап, жаныңды қуатқа бөлейді.