Құрметті Air Astana жолаушысы!
Украинадағы соғыс — әлемдік авиация индустриясы үшін кезекті сынақ. Ақпан айының аяғында Ресейдің баса-көктеп кіруінен кейін негізгі жеткізушілер мен серіктестерге қатысты бірқатар шектеулер мен санкциялардың қабылдануы Air Astana компаниялар тобын Ресей Федерациясына және оның аумағының үстінде, сондай-ақ Украинаға барлық ұшу сапарларын тоқтатуға мәжбүр етті. Біз жылдам әрекет жасап, Стамбул, Бодрум, Анталья, Франкфурт, Лондон,
Сеул, Грузияның, Өзбекстанның қалалары сияқты бағыттарда және Қазақстанның ішкі бағыттарында өткізу қабілетін арттырдық. Көп ұзамай Черногорияға ұшу сапарларымызды қалпына келтіріп, Крит аралындағы Ираклион қаласына рейстерді орындай бастайтынымызды қуана хабарлаймын. Біз Прага мен Бангкок бағытындағы маршруттармен белсенді жұмыс жасап жатырмыз, олар жайлы да жақын арада жариялаймыз деп үміттенеміз. Сондықтан, маршруттық желіміздегі негізгі тармақтарды жоғалтқанымызға қарамастан, біз сіздерге бағыттар мен мүмкіндіктердің неғұрлым мол таңдауын ұсынуға тырысамыз, бұл соның ішінде өсіп келе жатқан әуе паркіміздің арқасында мүмкін болып отыр — ол жақында тағы екі жаңа
Airbus 321 Long Range лайнерімен толықтырылады. Осылайша, олардың саны онға дейін артады.
Біз соғыстан зардап шеккен адамдар үшін дұға етіп, әскери қимылдардың мүмкіндігінше тезірек аяқталуын тілейміз. 28 ақпаннан 16 наурызға дейінгі аралықта біз Польшаның Катовице қаласы арқылы Украинадан Қазақстанның 896 азаматын елге қайтарып, украин халқына 100 тоннадан астам гуманитарлық көмек жеткіздік, оның басым бөлігі президент Тоқаевтың тікелей бастамасымен жүзеге асырылды.
15 мамырда біз сіздерге — саяхатшыларымызға арнап жұмыс істей бастағанымызға 20 жыл толуын атап өтеміз. Осы уақыт ішінде бейілділік танытып, қолдау көрсеткендеріңіз үшін сіздерге алғысымыз шексіз. Сонымен қатар, мен өзімнің адал әрі бар ынтасымен еңбек етіп жүрген жоғары білікті әріптестеріме осы тамаша саяхаттың осыншалықты ұзақ уақыт бойы жалғасын тауып келе жатқаны үшін алғысымды айтқым келеді. 20 жылдық мерейтойымызда алдымызда тұрған орасан зор қиындықтарға қарамастан, сіздерді үшінші онжылдығымызда да қарқынды дамып, өсе беретінімізге сендіргім келеді.
Ұшу сапарларыңыз жайлы болсын!