Musa magangat rayat momurimon pason tulu karamaian Tadau Kaamatan toun diti
TENOM: Pokionuon di Boyoon Montiri Sabah Datuk Seri Musa Aman kumaa toinsanan rayat id pogun diti tuh momurimon do pason kiguno id sambalik tulu karamaian Tadau Kaamatan toun diti do ino nopo nga ‘Kotoonongan om Piombalutan’.
Minoboros isio do ilo pialatan suai poposorou do toinsanan rayat do kiguno kopio o kogos piombalutan om popogirot kagu kotoonongan rayat di mogisusuai sutu, tinaru, agama om koubasanan id Sabah.
“Kinotindapaan mogisusuai nuludan rayat mogisusuai tinaru, bansa om agama kopinamot pinonimpuunan Tadau Kaamatan nayatan pogun nogi ponokotanda do sunduan piobpinaian, oiyokotou om pisompuruan id Sabah kotilombus ogirot.
“Iti kopokito do sunduan pisompuruan toririmo osiliu koubasanan om koubasan koposion rayat id pogun diti,” ka dau ontok pinotimpuun do pangaramitan karamaian dilo ih notindapou di lobi 5,000 tulun nokorikot hiti konihab.
Mantad dilo, minoboros ih Musa do toririmo koporintaan pogun manahak sokodung poimponu doid pangaramitan om abaabayan koubasanan montok papawakas kagu pisompuruan di nosiliu gamut doid koburuon pogun.
“Mogisusuai koubasanan om kolumaagan tungkusan lobi 32 tinimungan kointutunan id Sabah pinoposiliu do pogun id siriba tongus diti do kobilangan om aiso doti id tampat suai.
“Idsuang ahal ngawi tadau Kaamatan, mimang noh do kirati kopio miampai laang porinta montok popoingkawas do tungkusan koubasanan om kololoisan kinoiyonon.
“Mantad dilo, angayan ku toinsanan tinan maganu boogian montok mamaramai kagu pangaramitan karamaian di mangan pohoroo id mogisusuai nayatan id pointongkop pisuk pogun idsuang timpu sombulan diti,” ka dau.
Minoboros isio do mogisusuai pangaramitan koubasanan id pogun diti nogi kaanu mamagayat lobi ogumu tutumombului mantad suang toiko labus pogun, om kaanu nogi popoinggumu kagu pomorunan ponombuluian om kosunion ‘ekonomi’ id Sabah.
Namot dilo, Ponorikohon Komiti Tagayo Karamaian Tadau Kaamatan Nayatan Pogun Tan Sri Joseph Pairin Kitingan minoboros do ilo nopo nga impoon montok popogirot do kogos pisokodungan toinsanan tinaru id pogun diti ih nakalaid noh nakaharo.
“Kinotindapaan togumu tulun mogisusuai tinrau om bansa doid pinoimaganan diti nokopokito do rayat toririmo kosokodung laang porinta montok momogompi kobilangan om kopogisuaian tungkusan om kaadaton koubasanan id Sabah,” ka dau ih nogi Kumoduo Boyoon Montiri Sabah. -Bernama