Upko au mangazu do pomihian parti toun diti
KOTA KINABALU: Kotinanan Pasokmomogun Kadazandusun Murut Bersatu (Upko) au mangazu do pomihian toun diti sumusuut koputusan Tinan Poingkakavas dosido pinopohuntan do Pitimbungakan Tagazo Tohu Toun insan parti dino ih timpuunon dino ozuvon ontok Oktober diti, ka di Monunuat Tagazo dau, Datuk Donald Mojuntin.
Tumanud disido, minaganu koputusan dino ontok pitimbungakan Tinan Poingkakavas Upko ih pinoniikon di ponovohi naamot Polosiden Datuk Wilfred Madius Tangau di ontok 29 April id hongkod upis parti dino id Donggongon, Penampang.
Kinopohuntanan dino nopo nga katanud miampai koundagan parti, ka disido idsuang kopoihaan doiti koniab.
“Tuduvan pinohuntanan dino nga montok papatantu do koposodiaan Upko montok tumoguvang do Pomihian Tagazo Ko-14 kapanau tavaavasi.
Saavi-avi boogizan Upko nokoponukab no ‘ hinimput sangod’ pomihian tagazo sanda-daau om masaon id kopoindahanan monimung om monguhud do kopoihaan kikoompitan id potitikid boogizan hamin koundangan pogun om parlimen,” ka disido.
Minoboos zi Mojuntin do momuu’an ngavi Upko asaasau mangazu do pisoomoan miampai puu boogizan gamut sakot om kapangasilan haang diti aanu mintong mantad kinoingkavasan ginumu puu parti dino.
Tumanud disido, idsuang timpu himo vuhan nakatahib, Upko nakaanu 3,327 puu vagu.
“Onu ih kopongungunsub nga samakin ogumu puu kavavagu kaampai mantad Sinakagon Y. Ajangka dagai do ‘momentum’ diti samakin avakas ontok vuhan ngavi mikot.
Mositi nogi Upko papatantu do parti diti om pisompuuvan okon noopo gompizon katapi poingkavason nogi,” ka disido. - Bernama