Gunoo kosiwatan pingludaan toilalaan montok kapaganu do karaja tosonong monulung paganakan sompori-pori: Jainab
KOTA KINABALU: Pokionuon di Montiri Kotundaan rayat om Ahal Momoguno Datuk Jainab Ahmad Ayid o tinimungan komulakan ih nakaanu pingludaan toialaan pinosodia do porinta mooi kopomoguno do kosiwatan dilo miampai tososonong.
Minoboros isio do komulakan mositi momoguno do toilalaan dilo miampai tososonong montok momonsoi karaja mooi kaanu monulung paganakan sompori-pori.
“Graduan mositi do lobi koponokialit om apandai mamagahau kosiwatan pakarajaan di lobi kapangajamin timpu tabantalan mooi do laang porinta poposodia do mogisusuai kursus pingludaan miagal kaganaan kopongolumisan om spa au iman- iman,” ka dau.
Noboros disio ahal dilo ontok pinotimpuun do pinonutuban Abaabayan Konvokesyen Rozsall Beauty Academy id Auditorium Yayasan Sabah di tadau Koonom nakatalib.
Id ramai dilo, nokotindapou nogi ih Potunud Rozsall Sdn Bhd Salina Ali.
Kiginumu 97 graduan tajaan Yayasan Peneraju nakaanu minomupus do ponginabasan Diploma Terapi Kolumisan id Rozsall Beauty Academy solinaid onom wulan tuminimpuun wulan Kosiam toun nakatalib gisom 31 Mac toun diti.
Namot dilo, pinosorou nogi di Jainab o molohing mooi do kapanahak sokodung kumaa tanak ngawi diolo montok momoruhang toilalaan kumaraja sundung pia pakarajaan dino id labus pogun Sabah.
“Pinoilo oku do bogian Rozsall haro pinoposodia do kosiwatan pakarajaan miampai touki mantad KL nga au ogumu ih minamagahau kosiwatan dilo sabap aiso sokodung molohing sundung pia touki poposodia do pongidopan om padsakaian kumaa doid tiyonon karaja.
“Katapi osian kopio kakaal haro wookon graduan ih au muhang kumaraja sundung pia noludah noy yolo miampai toilalaan miampai aiso kabarai, om pinoobi do porinta,” ka dau.
Minoboros ih Jainab do sinakagon komulakan baino kountung kopio sabap toinsanan dino pinosodia kaamung noh timpu ‘temuduga’ ih nulud noh di upisor pingludaan miagal Rozsall.
“Om montok kumaa molohing, onuai noh kosiwatan om kotumbayanan kumaa tanak ngawi dikoyu montok momoruhang do toilalaan kumaraja.
“Apatut sorohon, pomorunan kolumisan om spa diti nopo nga lobi ‘ prominen’ id Semenanjung doulu noh id Kuala Lumpur miampai gaji ih posodiaon nopo nga lobi RM3,000 piagalon id Sabah bulun noh kapanahak gaji au kolobi do RM1,000,” ka dau.
Ka dau miampai kooyuon ekonomi timpu baino diti, komulakan mositi monokialit om mamagahau kosiwatan pakarajaan di lobi kapasanang timpu tabantalan.