Yayasan Sabah nokoponohuod soosomok RM1 bilion montok manakadai layat - Musa
KOTA KINABALU: Mantad po di tinuidong di toun 1966, Yayasan Sabah nokoponohuod do soosomok RM1 bilion montok mongobi do mogisusuvai abaabazan montok layat id pogun diti.
Vozoon Montili Sabah Datuk Seri Musa Aman minoboos do tohuod dino nokomoi kaamung no pinopoobi do mogisusuvai abaabazan balajalan, kotundunan, koinsasanai kounahan om kotoinaan om kabaahan id mogikaakavo kaganaan.
“Poluntukan ih pinabalanja dino nopo kituduvan montok popobuu do pogun diti, hoohobi maza kotundaan tuhun kiguno. Mantad dino, Yayasan Sabah nakapanaak do sakadai miaga ponohuodan sikulasip, kotundunan, kohidasan om koposodiaan asrama montok susumikul id Sabah,” ka disido.
Noboos disido ahal dino ontok pinotimpuun do kapanaandakan kinouhiton toun ko-50 yayasan dino om usin pisa kopinamot koponoimaan kinouhiton toun ko-50 ih pinahabus do Bank Negara Malaysia doiti koniab.
Minongomi potihombus, minobos zi Musa do tumihombus o Yayasan Sabah manaak sakadai doid layat id pogun diti miampai tumanud ponuugan timpu.
“Kalaja Yayasan Sabah montok monuhung layat nosimbanan tumanud koponuugan toi kosimbanan timpu sabap ‘evolusi’ dino kiguno montok papatantu do kalaja dino (monuhung layat) tomoimo kikosudongan miampai kopokionuon, om koozuvon timpu,” ka disido.
Kokomoi koponoimaan kinouhiton toun ko-50 Yayasan Sabah, minoboos zi Musa do Yayasan Sabah nokoingkavas miampai kinangazan tavasi mantad podi pinonuidongan hinominon dino miampai minonoodo mogikaakavo kinahantazan montok monuhung layat id pogun diti.
“Kinangazan tavasi Yayasan Sabah nopo nga ‘berkat komitmen’ momuu’an ngavi timpu nakatahib ih abalani om kivaa pongintangan tosodu. Mantad dino, pokionuon ku o pakaakalaja ngavi Yayasan Sabah tumihombus sumodia montok tumoguvang do ponokiahitan.
“Mositi abalani tokou montok monoodo ponimbanan toi ‘transformasi’ ih popoguhu do ‘kreativiti’ om ‘inovasi’ vagu ih kamampu montok momodimpot do iman-imanon,” ka disido.
Pokionuon nogi di Musa o toinsanan pakaakalaja Yayasan Sabah montok tumihombus misokodung om minggisom montok papatantu do yayasan dino tomoimo ‘relevan’. -Bernama