Sodop Unduk Ngadau minomogulu Tadau Kaamatan Tuaran
TUARAN: Sodop Unduk Ngadau 2016 kopinamot Karamaian tadau Kaamatan nayatan watas Tuaran pinaharo id iso hotel hiti, di kawawagu.
Tombului Tapantang id ramai dilo nga ih Montiri Koporintaan Kinoiyonon om Pomulaminan Datuk Seri Hj Hajiji Hj Noor id nogi Adun Sulaman. Tinanud isio di sawo, Datin Seri Juliah Salag.
Nokotindapou nogi ih Montiri sains, Teknologi om Inovasi ih nogi Puru Parlimen Tuaran Datuk Seri Panglima Madius Tangau om sawo, Datin Seri Dr Jainah Sintian.
Kinorikotan diolo rinamit di Upisor Watas AM Ibnu AK Baba ih nogi ponorikohon Komiti Tagayo Karamaian om Ponorikohon Komiti Unduk Ngadau Gundohing Kiron.
Abaabayan kolimundukon id sodop diri nga pomilian nakamanang ngawi ‘gelaran subsidiari’ Unduk Ngadau.
Abaabayan id sodop diri nokopongintong di Flora Stepen nakamanang duo gelaran, ilo nopo nga Tati Koubasanan Chanteek Borneo om ‘Rekabentuk Kreatif Terbaik’, om gelaran Sumandak Ka’anangan (Ratu Popular) namanang di Melanie Anis Stephen.
Frecilla Gukim nopo nga nakamanang gelaran Sumandak Osu’au (Miss Friendly) om ih Feyrajoyce Stannis nopili sabaagi Sumandak Alawa (Miss Natural Beauty).
Namot dilo, Petrus Boyd Pensin nakamanang wawa ‘Designer Award’.
Unduk Ngadau Tuaran 2015, Isabelle Clarence nalap nogi pinapaharo do pokitanan id sodop dilo.
Pialaan panantaban Unduk Ngadau Tuaran 2016 pohoroon id Dewan Tun Hamdan ontok 18 Mei kopinamot Kapanandakan Tadau Kaamatan Nayatan Watas.
Adun Kiulu Datuk Joniston Bangkuai, Momuruan Kotundaan Rayat ( PPM) Tamparuli Datuk Jahid Jahim om tombului tapantang Datuk Gerard Goh kotindapou nogi id sodop dilo.