APMM nakaanu ponulungan monginsada Kudat mogihum bot id siriba daat
KUDAT: Agensi Popogirotkuasa Maritim Malaysia (APMM) nakaanu do ponulungan koisaan monginsada Kudat id kaparagatan mogihum om manampasi (SAR) id kinoiyonon bot ih nokito poinsawit id pukot monginsada songkosodop pogului naratu kawagu id saralom daat.
Bot dino ih sinakaian di apat tulun notorob ontok id pindalanan mantad Pulau Balambangan pakaayan id Kudat di ontok 2 Mei nakatalib.
Potunud APMM Wilayah Sabah om Labuan Laksamana Pertama Maritim Mohd Zubil Mat Som minoboros do iso bot monginsada pukot mamagayat id korolomon 100 meter timpuunan maamgayat pukot id koiyonon dino nokomoi di tangadau konihab.
“Kosuabon diti ( konihab) pinapaharo do ponolopan tuminimpuun jam 7.30 kosuabon mantad Susumangod Daat Diraja Malaysia (TLDM) nga gisom baino aiso poh nunuunu nokito. Piwolitan kopongintangan id saralom waig limo meter noh om id siriba daat nopo nga kiburutak miampai kikinapal iso meter.
“Om osusuusa modtotolop mantad TLDM montok papaharo do kopogihuman,” ka dau doid monunurat abar hiti konihab.
Apat munggui ih natagak id kinantakan dino nga ih pasangan misaasawo mantad Sepanyol, David Hernandes Gasulla om Martha Miguel, goduo-duo diolo kiumur 30 toun, rayat China ih nogi sanganu resort id Tanjung Simpang Mengayau, Tommy Lam Wai Yin, 45, om tondu kinoiyonon ih nogi pakaraja resort, Armella Ali Hassan, 23.
Songkosodop, iso mantad injin bot dino nokomoi nokito poinsawit id pukot monginsada, nga iso kagu injin 3 kuasa kuda om bot naratu kawagu id suang waig ontok ginayat suminalakoi di monginsada.
Alen Lam, tadik Tommy, kalapas dino pinapatantu do inijn 3 kuasa kuda ih nokito dino nopo nga injin bot ih natagak tumanud do pongintangan pisuaian id injin.
Minoboros ih Mohd Zubil do sokiro ko bot dino nokomoi kaanu mogowit sumalakoi mantad siriba daat baino (konihab) ino koponulung doti do ponoriukan bogian monguasa kokomoi do mogisusuai doti ih nokoimamang bot om apat tulun di kiharo id sakai bot dino nokomoi ontok bot dino notorob.
Minoboros isio do paganakan tutumombului rayat Sepanyol dino nokorikot suminolowot dau id upis APMM hiti di kosuabon konihab om nonuan iyolo do boboroson kopointarangan kokomoi do laang tinan monguasa Malaysia montok mogihum munggui.
Ka dau paganakan pasangan misaasawo dino nasantaban ginawo miampai laang di pinapanau do tinan monguasa Malaysia om minonongkotoluod doid APMM om koporintaan Malaysia nogi.
Namot dilo, Monunurat Koisaan Sanganu Kapal Monginsada Kudat Johnny Wong pinoposorou do kiikira 100 mongindapu bot monginsada kikoompitan dagang id watas dino nokomoi tuh manahak pisokodungan poimponu doid puru SAR miampai poporuput sokiro do kokito do nunu noopo kakamot kobilangan id daat.
Ka dau soira kokito do kakamot kobilangan miagal dilo, pinosorou o monginsada tuh au mongiduan do koiyonon dino gisom korikot puru koumoligan montok papasanang do papanau karaja ngawi SAR. - Bernama